NOTIZIARI NOVEMBRE 2006

1 NOVEMBRE 2006 

La gnove leç su riordin fondiari

I imprescj predisponûts de leç ai son stât sclarîts da Enzo Marsilio, Assessôr Regjonâl ae mont. Il Consei Regjonâl, cemût che ducj ai san, a à fate buine la leç su pal riordin fondiari inte zone montane.

La gnove leç e seonde la metude in vore di ativitâts indreçadis a miorâ l'ûs dai terens montans pe agriculture, pocant intal stes timp pal dopleament de economie, de ecologjie e dal sociâl (dutis robis che il setôr primari al cjape dentri).

La disposizion e dà un sburt ai Plans di insediament produtîf, ae dade dongje di ditis agriculis funzionâls e di mûts di aciertament de usucapion.

Cun di plui, la leç, e previôt gnovis formis di sostegn e rilanç che coventin aes impresis agriculis, pal svilup de imprenditorie locâl soredut da bande de zoventût, pe diminuzion dai coscj di produzion e par peâ adun lis ativitâts rurâls cun chês altris presints sul teritori.

Si è dade dongje la Zto de Cjargne

Tai diis stâts si è dade dongje la Zto (Zone teritoriâl omogjenie) de Cjargne, volude dai 28 sindics dal teritori cu la supervision de Comunitât montane, par podê partecipâ, tant che sogjet ugnul, al consei dal Ato (Ambît teritoriâl otimâl), creat dopo la metude in vore de leç Galli pe metude in sest dai servizis de aghe. L'acuardi che, daûr de leç regjonâl 13 dal 2005, al à dât vite al Zto de Cjargne, al è stât pandût da Lino Not, president de Comunitât montane de Cjargne, al sindic di Udin, Sergio Cecotti, coordenadôr di cheste prime dade di metude in vore dal Ato.

Tai diis che a vignaran, la assemblee dal Ato e pensarà, prime de metude adun dal consei, previodude pal 21 di Novembar, se dâ acet uficialmentri ae Zone teritoriâl omogjenie de Cjargne. "Vin gust - al à dit Not - parcè che ducj i 28 sindics cjargnei ai àn poiât la pensade firmant l'acuardi, judant cussì un progjet par ducj compagn di valorizazion dal teritori.

Cgil de Alte Furlane, centenari cun Leonardo Zanier

La emigrazion tant che carateristiche de identitât furlane. La Cjamare dal Lavôr de Alte Furlane e à sielt chest argoment par memoreâ il centenari de Cgil, intune serade che e à viodût la partecipazion dal poete Leonardo Zanier, un dai plui famôs emigrants furlans, nassût in Cjargne ma che da agnorums al vîf in Svuizare.

La manifestazion, cul non di "Storie e memorie de emigrazion in Alte Furlane", si è davuelzude aì dal Teatri Lavaroni di Dartigne. Daspò des poesiis di Zanier la serade a è lade indevant cuntune biele piece teatrâl de atore Rita Maffei, che e a let vecjis letaris di emigrants. 

Sapade – Udin – Belun, colaborazion jenfri Provinciis

Viabilitât, minorancis linguistichis, ambient, afârs comunitaris e energjie. Chescj i argoments di fonde di dulà partî par meti in vore une colaborazion jenfri lis provinciis di Udin e Belun, che si son cjatadis aì dal municipi di Sapade. In detai, i acuardis cjapâts a rivuardin prin di dut la scugne di meti in sest la viabilitât jenfri Cjargne e Cjadovri e la pensade di meti adun un grup che al studi progjets inter provinciâi a livel european. I doi presidents, Marzio Strassoldo e Sergio Reolon, cui lôr assessôrs, ai àn marcât la volontât des dôs aministrazions di incressi i rapuarts par davuelzi miôr problemis comuns e scambiâsi esperiencis. "La sielte di cjatâsi a Sapade no è stade cence fonde - al à mutivât Strassoldo – cheste comunitât in fats e à tantis robis talis e cualis a altris lûcs furlans, come Sauris e Tamau e duncje e è un pont di partence ideâl par tacâ a lâ insot cui problemis che o vin compagns". "In cheste maniere - ai àn dit Strassoldo e Reolon - vuelin meti adun un grup che al studi iniziativis par sfrutâ lis risorsis europeanis metudis a disposizion pai progjets transfrontalîrs".

REGJON – INTEROGAZION CUINTRI DAI TAIS DE 482/99

Il cussì clamât decret Bersani al proviout une schirie di tais ae spese publiche e inte liste dai tais e je dentri ancje la vôs “minorancis linguistichis”; i tais par cheste vôs a laran cressint di chi al 2009, cuant che a rivaran a dibot il 50%.

Considerât che di pôc timp la noste regjon e à firmât cul guvier Prodi un protocol di acuardi li che si proviôt, par une plui atente valorizazion des lenghis des minorancis, un gnûf e plui fuart finanziament de leç 482/99, il conseîr regjonâl Giancarlo Tonutti al à presentât une interogazion là che al domande al President de regjon e al assessôr ae culture di savê ce che a àn intenzion di fâ, tignint cont dal protocol za firmât cul guvier, par blocâ i tais che il decret Bersani al à fat ai finanziaments de leç 482.

Resie - Gnûf diretîf pal Parc des Prealps Juliis

Gnûf consei diretîf pal Parc des Prealps Juliis, tornat a meti sù de Zonte regjonâl su propueste dal assessôr ae Mont, Enzo Marsilio. Il diretîf si cjate a Resie e al cjape dentri i sindics di Scluse (Luigi Marcon), Lusevere (Claudio Noacco), Mueç (Ezio De Toni), Resie (Sergio Barbarino), Resiute (Emilio Beltrame) e Vençon (Amedeo Pascolo). Antonio Buttolo al sarà il secont rapresentant di Resie, biel che esperts pe gjestion dai parcs naturâi a son Carlo Toniutti, Aldo Dionisio e Lorenzo Beltrame. Alfin, Diego Zamolo pai imprenditôrs agricui e forestâi e Mario Ulian par chei turistics.

Vençon - L'assessôr Bertossi ae "Fieste de Cavoce"

Vençon al è un dai puescj plui rimarchevui de ufierte turistiche dal FVJ. Chest, in struc, lis peraulis dal assessôr regjonâl aes Ativitâts Produtivis, Enrico Bertossi, presint domenie 22 inta place dal municipi ae inaugurazion de "16 Fieste da Cavoce", apontament cjavat fûr de storie de citât medievâl. In fats, si conte che cuant che a mancjave dome di finî di fâ sù il tor, daspò che jerin za stadis fatis la muraie, i palaçs, il domo, chei di Vençon no vessin avonde bêçs par paiâ il sorestant incargât dai lavôrs. E chest om, par finî istès il lavôr, al vebi poiât, vie pe gnot, insom dal tor, inpen de previedude sfere daur, une cavoce piturade daur. Cul lâ dal timp, chest fat, inte viele tradizion popolâr, al à peât adun Vençon (citât medievâl ricostruide dopo dal taramot e in cumò monument nazionâl) e la cavoce.

Cjargne - Une filiere regjonâl bosc-len-energjie

Lunis ai 6 di Novembar si fasarà il prin incuintri de taule di lavôr, coordenade de Regjon FVJ, che a viôt la partecipazion de Comunitât montane de Cjargne, de societât Len Servizis, dal Consorzi boscs cjargnei, dai Ispetorâts ripartimentâi dai boscs, de Aiel e des altris trê Comunitâts de zone montane, pe creazion de filiere regjonâl bosc-len-energjie. "L'imbastiment di un grup di lavôr pal svilup da filiere - al sclaris Luigi Cortolezzis, vice president de Comunitât montane de Cjargne - si met dentri un program di coordenament di dutis lis realtâts dal setôr e al è indreçât seti a dâ snait a produzion di energjie rinovabile, seti a inmaneâ intervents di jutori pes ditis dal setôr forestâl e de prime lavorazion, cun risultis buinis ancje su pal ocupazion e su pe calade des tarifis. Obietîfs che, dome lavorant adum, si podarà cjapâ". Inta gjestion dai implants e pe metude in vore di gnovis iniziativis a vignaran implicadis ancje la societât EnergyMont, di pôc implantade de Comunitât montane, e la gnove societât Esco, che si darà dongje dentri di chest an e dulà che ai son stâts invidâts a metisi dentri ducj i comuns cjargnei de Alte Furlane e chês altris trê Comunitâts montanis.

Tumieç - Incuintris formatîfs pes badants

Il comun di Tumieç, adun cu la Aziende dai Servizis Sanitaris numar 3 'Alte Furlane' e la Cooperative Cramârs , e invie une schirie di incuintris formatîfs par aprofondî argoments su pe assistence aes personis.

I apontaments son davuelzûts dal personâl de Aziende Sanitarie e a son indreçâts aes forestis che lavorin cjase par cjase tal furnî assistence ai vecjos, ai pedimentâts o in dut cas ae int cun problemis.

Stant la continue incressite da presince te nestre zone di badants, il comun di Tumieç al à pensat che al fos impuartant inscuelâlis tal miôr dai mûts su pai elements di fonde di une juste assistence a persone, massime pe difarence de nestre culture a pet de lôr. La formazion rivuardarà ancje la cognossince de rêt di servizis che si cjatin sul teritori, dulà podê fa riferiment in câs di dibisugne dai assistûts.

Damâr - Cuintri la Fibrosi Cistiche

In dute Italie a è stade fate la setemane de ricercjie cuintri la Fibrosi Cistica. Jenfri lis tantis iniziativis inmaneadis in ambît nazionâl, e jerin ancje previodudis dôs zornadis di informazion e cjapade sù di ufiertis pe Alte Furlane, aì dal Centri comerciâl "Vals de Cjargne" a Damâr; cun di plui, fintramai al 11 di Novembar si pues dâ 1 € a pro de ricercjie mandant un SMS al numar 48588 da ducj i celulârs Wind, Vodafone-Omnitel, 3 e Tim, o se no 2 € dal telefon fis.

La Fibrosi Cistica , magari cussì no, e je jenfri lis malatiis che si puartin fûr che e cjape i fruts, cun di plui e je la malatie plui slargjade tal nestri Paîs e ducj i agns, simpri di plui, aumentin i fruts malâts. La associazion a intint pandi cheste malatie, stant che a è un grum no cognossude, e e domande une ufierte pe ricercjie e par podê comprâ lis medisinis e i imprescj che a coventin ai fruts malâts.

Contribûts pai lûcs de Prime Vuere Mondiâl

Par recuperâ e valorizâ il patrimoni storic culturâl dai lûcs de Prime Vuere Mondiâl, la Zonte regjonâl, su propueste dal assessôr ae Istruzion, Culture, Sport e Pâs, Roberto Antonaz, e à fat buine la spartizion di bêçs par 300 mil euros, da dividi jenfri i 8 comuns des Provinciis di Gurize e Udin.

In detai, intal Comun di Paluce, chescj bêçs a coventaran a meti in sest i lozaments dal comant brigade alpine Tumieç in Pal Grant Disore e pal svilup dal Museu a viert dal Freikofel e dal Pal Grant. Impen tal comun di San Zorç di Noiâr a saran doprâts par inmaneâ une mostre fotografiche su pe Universitât castrense; a Foian invezir pe tignude a puest dai trois e di dut ce che and'è dongje da Doline dai Bersalîrs.

Darte - La storie di Luviee intun libri

Sabide stât inta stanzie di chel che une volte al ere l'asîl di Luviee, al è stât presentât il libri "...e simpri al seti laudât! Pre Giuliano al conte". Intal scrit, curat da Manuela Quaglia, il predi, muart tal 2004, al bute jù la storie dal paîs a partî dal 1600 fintramai a cumò in gracie aes ricercjis da lui fatis intai archivis di stât, in chei des glesiis e ancje dai siei ricuarts.

Paluce: avîs di concors “Disegne i alpins”

Il comun di Paluce, dopo vê dât la citadinance al 8 Reziment dai Alpins, al à inmaneât un concors indreçât aes scuelis mezanis e elementârs pal disegn plui biel sui alpins e sul otâf. Il concors al cjape dentri ancje i comuns di Cividât, Arzignan, Citadele e Pelegrin parmense. Obietîf de iniziative al è chel di pandi a zoventût la culture de mont e il spirit dal cuarp dai alpins, fasint conossi la storie dal 8, citadin onorari dal Comun.

I premis ai laran ai prins trê disegns e ai partissaran da une mountain bike cun cancelerie pai prins a un complet par schiâ e cancelerie pai seconts e tierçs.