NOTIZIARI NOVEMBRE 2006

22 NOVEMBRE 2006 

Studiâ i rius par evitâ lis montanis

Un mieç par cognossi e studiâ lis particolaritâts dai doi principâi rius da Valcjanâl e Cjanâl dal Fier, al è il libri "Parametris morfologjics dal bacin imbrifar dal flum Fele e dal riu Slizza", inmaneât dai tecnics provinciâi Gabriele Perressi e Moreno Pedna cul jutori dal assessôr ae mont de Provincie di Udin, Vittorio Caroli. «Il svilup des tecnologjiis informatichis - al à sclarît l'assessôr provinciâl - al à cetant modificât lis metodologjiis di studi e di ricercjie sientifiche e chest a no podeve no cjapâ dentri l'ambît de difese dal teren, ancje dopo l'aluvion dal 2003. Chest lavôr in fats al rapresente un pas indevant intal setôr de analisi dal compuartament dai bacins regjonâi. In cont di chest, il prontament di une bancje dâts teritoriâl - al à zontât - e furnìs un potent imprest di valutazion cuantitative de dade fûr, tai difarents bacins, di parametris e elements tematics bogns par studis di cualitât ideologjiche e idrauliche». Cumò scoltin ce che a nus à dit l'Assessôr Caroli su chest argoment.

PAULÂR – Consegnadis lis abitazions

Di pôc son stâts dâts fûr a chei che a vevin dirit 6 gnûfs lozaments popolârs fats dal ATER Alte Furlane in comun di Paulâr, in localitât Salet, dongje dal Centri anzians. I lavôrs, finîts di pôc, ai jerin tacâts intal atom dal 2004. Lis gnovis cjasis a son di metraturis difarents (cun une, dôs o trê cjamaris) par contentâ i dibisugnis di fameis cuntun numar diviers di personis. Il lozament dal planteren al è stât fat cun ducj i recuisîts par judâ – daûr de normative – i pedimentâts, e duncje cence barieris architetonichis. Ducj i apartaments ai àn riscjaldament propri e cun di plui, ognidun une cjanive e un garage. Difûr si cjatin un parc pes machinis e une largje zone verde. In detai, a va marcade la cualitât alte dai materiâi doprâts, soredut parcè che a rivuarde isolament termo acustic (rivestiment esterni, sieraments in PVC cun veris isolants). La spese a è stade di 865 mil euros cun contribûts rigjavâts dal articul 80 de Leç regjonâl 75 dal '82. Chest intervent al mostre l'impegn dal Ater par prudelâ e dâ un jutori a chei che, tignint aes lôr radis, a sielzin di continuâ a vivi intai lôr paîs.

Fieste dai ciclamins.

Come ogni an, domenie 26, di fûr di dutis lis Glesiis o inte place dal to paîs, saran dâts fûr i ciclamins. I bêçs cjapâts sù vignaran doprâts a pro de AGMEN dal Fvj par judâ la ricercje, la cure e la assistence dai fruts malâts di tumôr.

Scandai mandât fûr dal "Il Sole 24 ore"

«Nol è just fâ un paragon jenfri i risultâts sigûrs das elezions cun chel di un scandai, che al po vê falopis di campionament. In dut câs tra i dâts racuelts di un sondaç e il risultât das elezions, a mi samein dal sigûr plui crets chescj ultins». Cheste la note dal president de Provincie di Udin, Marzio Strassoldo, daspò da dade fûr da bande dal "Il Sole 24 ore" dal sondaç sul consens vût in ore presint dai presidents des provinciis talianis. «L'ultin rilevament al jere stât publicat dal gjornâl economic nazionâl intal Dicembar stât. In chê liste - al à dit Strassoldo – jeri al 46% des preferencis. Pûr pûr dome 4 meis dopo di cheste rilevazion, mi àn rielet a cjâf de provincie furlane cun dibot il 58%. Simpri te stesse dade - al à continuât - seont il sondaç de Ekma, dât fûr tal Zenâr stât, il president de Provincie di Udin al jere al 55,1% dai consens, che pôcs mês dopo al deventave il 58%». Il scandai fat pal "Il sole 24 ore" de Ipr Marketing al à, par Strassoldo, ancje une pecje di sisteme. «Da professôr universitari di statistiche, sint la dibisugne di cjapâ at che chest sondaç al è mancul sigûr a pet di chel de Ekma, par vie che Ipr a cjape dentri un campion di 800 personis in dutis lis provinciis, la ricercjie de Ekma, an cjape dentri tor ai 1.500, dibot il dopli. Daûr di ce che dopo al è sucedût cu lis elezions - al à sierât - pensi che, se propit vin di confrontâ lis rilevazions di dâts, al è lât un grum plui dongje il studi cjapat sù de Ekma».

VILE – Apontament cul tradizionâl Marcjât di Nadâl

Un dai moments plui spietâts dilunc il mês di Dicembar al è dal sigûr il marcjât di Nadâl di Vile, che chest an al è a sô 6 edizion. Ancje se a mancje inmò un mês a Nadâl, la atmosfere dal comun si scjaldarà cuntun conciert di grups musicâi locâi aì de Sale Don Fior. Domenie ai 26 Novembar, dut il dì, das 10, hobiscj, artesans e i produtôrs dal setôr alimentâr ai jemplaran lis stradis e lis placis dal paîs cun furniments, dolçs, regâi e ideis maraveosis pe fieste plui biele dal an. Il program de zornade al previôt animazions pai fruts inte canoniche cu la vignude di Sant Nicolau, che dal lontan Nord European al rivarà a Vile par dâ fûr golosets, bombons seti ai plui piçui che ai plui grancj. Aì da vecje stazion fintramai aes 4 daspomisdì ducj ai podaran lâ a fâ un zîr in Go Kart o cu lis mini motos dilunc il circuit prefissât. Come just no sarà dismenteade la tradizion e das 3, dilunc il pais si podaran sintî i simpri biei e cjârs cjants tipics, fats dal Grup Corâl "Sot la Nape ". Il marcjât nol lassarà fûr i savôrs da cusine cjargnele, che si podaran cjatâ tai stands adun cui bogns vins dal Cuei (Collio), cui che no sopuartâ il frêt a pues impen, indreçâsi intes tantis ostariis dal paîs, dulà che l'atmosfere a è di cjase.

Paluce: incuintri su pal probleme dal alcul

Sabide ai 25 di Novembar aes 3 dopo misdì si fasarà inte sale San Jacum di Paluce, un incuintri dal teme: "Alcul plasei di cognossiti!". L'apontament al vignarà presentât e moderât dai maestris de ACAT cjargnele. Ducj a son invidâts a partecipâ.

DARTE - Lis termis a "Idee Nadâl" a Udin

Presints pe prime volte in fiere a Udin lis termis di Darte proponin, dome tai dîs de manifestazion, origjinâls ideis par fâ regâi a presîts scontâts. Si podarà comprâ i prodots di sprofumarie olistiche doprâts tal centri termâl, sbassâts dal 20%; cun di plui, lis cedulis "Regale il benstâ" vignaran dopradis par un altri scont dal 10%. Regalâ il benstâ a è simpri di plui une usance seti pai zovins che pai plui vecjos: cui che par Nadâl a cjatarà in regâl un pachet benstâ (che ai partissin da 16,90 €) al podarà sielzi i trataments plui adats da fâ tal Centri Aquadea des Termis di Darte, viert dut l'an.

Un biel pinsîr par une mari, un pari, i nonos, ai amîs, al morôs o ancje dome par se stes. Une pensade che e à za vût un grant sucès in ocasion di fiestis tant che chê dal pari, da mari, des feminis o di Sant Valantin. Telefonant aes termis, lis operadoris dal stabiliment prepararan, ad hoc par ogni persone, un tratament personalizât.

Coop Cramârs jenfri i vincidôrs di COM-PA a Bologne

La Cooperative Cramârs di Tumieç e à vint il Premi Cualitât dal 2006 pe prime scriture dal contrat sociâl fra om e femine (progjet european indreçât a inmaneâ une paritât concrete). La premiazion si è davuelzude tai dîs stâts intal ambit di COM-PA, Salon european de comunicazion publiche e dai servizis ai citadins e aes ditis, metût sù a Bologne e che al frontave il teme "Citâts, regjons, Europe: cuâl comunicazion publiche?". «Sin cetant contents dal premi vût - a dit Stefania Marcoccio, vice president di Cramârs e a cjâf de iniziative comunitarie - jessi jenfri i vincidôrs di cheste impuartant manifestazion, osservatori privilegjât pai operadôrs publics e privâts impegnâts inte modernizazion de publiche aministrazion, intal rindi plui zovevui i servizis e incressi la cualitât des relazions cul citadin, a dimostre che la int e à capît e preseât il lavôr da nô fat a mieç di une propagande di sensibilizazion par tornâ a meti jù il contrat sociâl».

Paluce: fat bon il gnûf plan regoladôr.

Il Consei comunâl di Paluce ai 13 di Novembar stât al à fat bon a unanimitât il gnûf plan regoladôr. Cussì si siere un procediment tacât da passe 9 agns. Gust al è stât pandût dal sindic, Aulo Maieron: «Dilunc la sentade vin dât acet a plui part des osservazions presentadis da int, cirint une soluzion par ducj i problemis ancje chei plui piçui, in mût di invoiâ i zovins a fermâsi a vivi cassù». Propi par chest, il plan, al à dât spazi ae determinazion di areis edificabils, no dome a Paluce ma ancje tes frazions. Si son po dopo confermadis lis zonis artesanâls za presints. Par chel che a rivuarde il turisim, la culture e il sport, i intervents saran indreçâts soredut ai Laghets di Tamau e al museu a viert da Grande Vuere. Al è ancje stât inviât il procediment pa metude dentri dal Colians, dal Dimon e dal Paulâr fra i sîts di interes comunitari.

Cun di plui, tant dal consei, son stadis fatis buinis ancje lis variants urbanistichis par inmaneâ doi impuartants lavôrs: i parcs pes machinis a Cleulis e la metude in vore (su propueste de Comunitât Montane de Cjargne), di une piste ciclabil, fra Darte, Sudri, Çurçuvint, Paluce e Trep. La piste a podares vê ancje un altre finalitât, par vie che sot il so percors si fasaresin passâ i cavos di fibris otichis pai colegaments internet a alte velocitât, jemplant cussì un vuêt tecnologjic di dut il Cjanâl.

An european de mobilitât dai lavoradôrs

La libertât di spostament dai lavoradôrs al è il principi di fonde dal marcjât unic european, in fats al è un dirit confermât da ducj i tratâts. Cun dut chest la sô plene metude in vore a è inmò une fantasie pai tancj berdeis che si cjatin tal mieç. Un di chescj dal sigûr al è la crise dal ocupazion in dute la Europe , il dificil stramudâmint des competencis professionâls, il no cognossi lis lenghis. Ma il probleme plui grant al è forsit la mancjance di informazion su lis oportunitâts che la Comunitât europeane a invie par incressi la mobilitât, massime dai zovins, seti students o lavoradôrs.

Propi par inscuelâ e sensibilizâ i zovins ae gnove "dimension de mobilitât", dilunc l'an european de Mobilitât dai Lavoradôrs, la Cjase par la Europe di Glemone, e à inmaneât aì dal I.S.I.S. "Pio Paschini" di Tumieç un incuintri indreçât ai scuelârs. In cheste ocasion la Cjase par la Europe e à dât fûr materiâl informatîf, la testemoneance di un lavoradôr forest in Italie e la presentazion dal sît european dal EURES.

ALTE FURLANE - Bant pe valorizazion dai prodots tipics

Un bant pe presentazion di progjets integrâts public privât pal dopleament des manifestazions di promozion dai prodots tipics. Cheste la iniziative dal Gal Ats Prealps Juliis, indreçât a inmaneâ struturis che a servissino a metude in vore di manifestazions agroalimentârs e enogastronomichis, par pandi i nestris prodots locâi, e par inviâ intervents di implei e gjestion dai implants metûts sù propit par chestis manifestazions. I bêçs metûts a disposizion dal bant a son di 483 mil euros, di chescj 115 mil spartîts jenfri il Plan di Svilup Locâl e il Program regjonâl pe iniziative comunitarie Leader+, finanziât cu lis risorsis dal Font Regjonâl pal Svilup de Mont. La percentuâl dai intervents pe predispozion dai implants a è dal 50%, cuntun cost massim di 80 mil euros, biel che pe gjestion, il contribût al rive fin al 80%, cuntun massim di 35 mil euros.

TUMIEÇ - Museu "Gortani" di scuvierzi

Ae scuvierte de Cjargne plui sclete, smirant la laboriositât e la creativitât dai siei artesans, dilunc i agns fermade intes cjossolis di ogni dì, sui vistîts, su pes pignatis, sul bronzin, su lis arcjis. Un vêr viaç intai ricuarts che a si cjate dentri il Museu des Arts Popolârs, prontât tal palaç Campeis, un edifici dal '700

Il 3 di Dicembar il Museu al sarà viert a gratis par ducj, dant cussì la pussibilitât di cognossilu ancje cul jutori di une vuide. La mostre è nassude in gracie da passion di Michele Gortani, che in agns di lavôr e di ricercjie in ducj i cjanâi cjargnei, dal 1920, al à metût dongje dut il materiâl che vuê si cjate intal museu tumiezin, une realtât che pa impuartance des robis metudis fûr, al è un dai plui grancj museus etnografics europeans.