NOTIZIARI NOVEMBRE 2006

29 NOVEMBRE 2006 

Une note dal president de Provincie di Udin

«Sei un grum content che il Consei regjonâl al vebi dât parê favorevul al disen di leç costituzionâl pe union dal comun di Cinto Caomaggiore. Chest al à di jessi dome il prin pas par che ai tornino al Friûl ducj chei comuns che si sintin furlans. Une procedure che vorà di cjapâ dentri ancje chei che a àn votât a grande maiorance a mieç referendum par tornâ al Friûl storic, ma che no son rivâts – par pôc - al quorum altissim stabilît de leç. Cun chest discors intint ancje il câs di Sapade che, pûr fasint part da diocesi di Udin, a è inmò tal Venit».

Cun di plui, il president Strassoldo al à volût rispuindi aes peraulis dal president dal Venit, Giancarlo Galan che al à stimât la facende di Cinto tant che une "stupiditât politiche". «Di front de paronance politiche dal president venit, pant dut il gno dispiet e volarès che i politics dal FVJ a si unissin par fâ in mût che chei paîs che a vuelin tornâ furlans a puedino fâlu. A chescj paîs a va dute la me solidarietât. Lis peraulis di Galan a mostrin che i mutîfs par scjampâ dal Venit ai son pardabon valevui».

Ricercje e tecnologjie son lis clâfs dal doman

Ricercje e tecnologjie son lis fondis dal doman european e dal nestri progrès. Lu à dit il president de Agemont, Alberto Felice De Toni, tant de cunvigne "Ricercje e svilup intes piçulis e mezanis impresis: lis oportunitâts dadis fûr dai gnûfs programs europeans", inmaneât da Agemont, adun cul sportel Apre (Agjenzie pe promozion de ricercje europeane). A cunvigne (che e à pandût lis iniziativis dal 7 Program Cuadri, operatîf dal 1 dì di Zenâr 2007) ai son intervignûts l'assessôr regjonâl al Lavôr, formazion, universitât e ricercje, Roberto Cosolini e Furio Honsell, retôr de Universitât di Udin. Impen a cjacarâ di argoments tecnics son stâts Martina Desole, funzionari Apre di Rome, e Antonio Loredan, funzionari de Comission Europeane ricercje di Bruxelles.

«Il program cuadri, une oportunitât pes pmi - al dit De Toni - si fonde su pe idee di plateforme tecnologjiche, ven a stâ su pe metude in vore di une filiere in podê di inviâ un sisteme di network che a fasi in mût che lis impresis a puedino competi a nivel mondial. Za 15 agns indaûr Agemont e veve capît la impuartance de rêt e dal trasferiment tecnologjic di piçulis e mezanis ditis e par chest a veve tacât - za in che volte - a inmaneâ une schirie di laboratoris di ecelence, dentri dal CIT, che ai judin lis PMI a cressi e a competi». La iniziative a si met dentri di "Marciâts Vierts" - Docup Obietîf 2 2000-2006 - il progjet indreçât a dâ un sburt aes impresis regjonâls par che si inserissino simpri di plui intai marciâts forescj e si incressi la colaborazion internazionâl intal ambît de ricercjie.

Screât il Circul teritoriâl de Margherita intal tarvisian

Ancje tal tarvisian si è dât dongje il Circul teritoriâl de Margherita. Tancj iscrits e simpatizants dal partît, tra cui il sindic di Malborghet Oman e i conseîrs comunâls di Tarvis: Treu, Izzo e Pippan, ae presince dal coordenadôr provinciâl Spitaleri e dal puartevôs di cjanâl Marino Ambrosino, ai an inmaneât il circul dal Tarvisian de Margherita che al cjape dentri i comuns di Malborghet - Valbrune e Tarvis.

Il circul al complete la presince sul teritori de Margherite furlane e al dâ continuitât e fuarce al assum de Margherite e di Intese Democratiche a nivel regjonâl, ricognossint ai rapresentants politics, che ai son al Guvier regjonâl, l'impegn che ai àn dimostrât in chescj agns, finanziant tancj intervents e contribuint, adun cui ents locâi, al doman di chest cjanâl. Intes setemanis che vignaran, il circul al inviarà une schirie di iniziativis di caratar programatic e di confront, di mût di pandi il contribût furnît e i intervents che la Margherita e à intenzion di inviâ inte zone.

LAUC - Presentazion de Agjende Furlane 2007

Domenie ai 3 di Dicembar, aì da sale polifunzionâl de Cjase dal Popul di Lauc , si fasarà la presentazion de Agjende Furlane 2007.

Daspò dal salût dal sindic Olivo Dionisio, si larà indevant cun Franco Romanin e Ario Cargnelutti, che ai presentaran in detai la agjende.

Da marcâ, in cheste ocasion, la presince dal poete cjargnel Eligio Nassivera, che al leiarà cualchidune des sôs poesiis. Cun di plui l'incuintri al sarà legrât da un orchestrine locâl. L'apontament si sierarà cuntun rinfresc, ufiert dal albierc difondût e dai comerciants dal comun.

Dôs pagjinis de Agjende son avodadis al Plan di Lauc, unic comun cjargnel a cjatâsi dentri de publicazion; cun di plui, il sindic Olivo Dionisio al à dedicât une pagjine al zimulament cul comun carinzian di Rosegg, fat il 19 di Avost stât intal ambît di impuartants iniziativis e fiestis .

Braconîr al cîr di cjapâ sot la vuardie cjace

Al cope un cjavrûl improibît, al cîr di puartâsal daûr ma al ven scuviert da pulizie provinciâl, nol rispiete l'alt e al cjape sot la vuardie. Al è sucedût a Verzegnis domenie stade: un at di cuintribant che al vorès puedût daventâ une disgracie. Sul fat a sta indagant la procure di Tumieç, in spiete dai dûrs provediments de comission dissiplinâr regjonâl cuintre un inzegnîr cjargnel e il so amî. Chescj i fats dâts fûr de pulizie provinciâl: «tor misdì di domenie stade, une mascje di cjavrûl a è stade copade cuntun colp di sclope sore da spale». Dopo vele copade, il cjaçadôr al è vignût jù cence la bestie: in fats fasi cjapâ cuntun cjavrûl copât fûr stagjon (in cumò la cjace a è sierade) a podarès volê dî, riscjâ di no podê lâ plui a cjace par un grum di timp. In dut câs il cjaçadôr no si ere inacuart che lis vuardiis provinciâls lu vevin za lumât. «Chest fat - al à dit il diretôr de Riserve di cjace di Verzegnis, Franco Da Pozzo - al è trement ancje parcè che il colpevul, pûr cjapât, al à continuât a falâ. Un tîr di cheste fate - al à zontât - a scugnarà dal sigûr vê conseguencis dissiplinârs. Displâs che la regjon no mostri interès par chescj problemis, no inviant punizions cuintri i braconîrs cjapâts. A samee scuasi che nissun tecnic regjonâl a vebi competence o volontât di intervignî».

Distret de cjadree, fat bon de Zonte il Plan di gjestion de crisi

Contribûts par assunzions e stabilizazions dai contrats a timp indeterminât e percors di compagnament personalizâts. Chescj i intervents previodûts dal Plan di gjestion pe serie dificoltât dal distret de cjadree, fats bogn de zonte provinciâl. La zonte Strassoldo e à dât il vie al plan inmaneât dal assessôr al lavôr, Daniele Macorig, e metût adun dal Servizi Lavôr e Colocament par intervents a pro dai operaris licenziâts o a riscjio di licenziament de filiere len/cjadree dai 11 comuns dal distret. « La Provincie - al à sclarît Macorig - si sta impegnant par dâ une svelte rispueste e un supuart concret aes personis - passe 200 - che fin cumò an pierdût il lavôr. Chest al è dome il prin toc dal intervent : dentri de fin di Zenâr, si fasaran incuintris cui operaris licenziâts. Intant si cjatarin cui rapresentants des categoriis e i sindics de zone, po dopo inviarin la fase operative. Cun di plui par un miôr servizi ai lavoradôrs e aes ditis locâls - al à sierât - vin slargjât l'orari di vierzidure dal sportel di Manzan». In detai, il sportel di vie Nadison al numar 34, al sarà viert dal lunis al vinars des 9.30 a misdì.

Vie libare ai controi su pes domandis di contribût pal riscjaldament

Tacaran tai dîs che a vegnin i prins controi su pes domandis che àn vût il contribût pal riscjaldament intai 28 comuns cjargnei. I controi saran davuelzûts dai funzionaris de Comunitât Montane de Cjargne, dulà che son rivadis lis domandis e la che a è stade fate la graduatorie. Saran 400 lis domandis studiadis par controlâ la veretât des declarazions dadis, parcè che su la fonde di chestis son stâts dâts fûr i contribûts. «Nus è sameât just - al dîs il president de Comunitât montan, Lino Not - inviâ subit i controi, par capî se i jutoris setino lâts aes personis che verementri a vevin dibisugne». Intes setemanis stadis l'ent al à inviât una letare a ducj chei che ai àn vût i bêçs, cu la spiegazion dai criteris di dade fûr dai contribûtrs e la visade dal inviament dai controi

I piçui comuns cjargnei viers la fusion?

Isal par sparagnâ o isal il prin pas viers la cancelazion des identitâts comunâls? Sarano garantidis lis rapresentancis politichis e duncje lis istancis di specificitât di ogni ent? Par rispuindi a chestis domandis (e cruziis), il grup CARNIA IN MOVIMENTO al à inmaneât un incuintri cui sindics des dôs comunitâts che ai àn za sotscrit un acuardi pe fusion : Sudri e Çurçuvint.

La serade a tacarà cu lis peraulis dal professôr Guglielmo Cevolin, rimarchevul giurist e om espert te materie. Il professôr da Universitât di Udin al spiegarà a int e ai aministradôrs la leç 1 dal 2006, che e à viert il procediment di fusion jenfri i comuns plui piçui.

Il comitât a nol vûl cjapâ posizion su chest argoment ma al crôt just cognossi e fâ cognossi a ducj, intai detais, un argoment di atualitât e dal sigûr impuartant. Al incuintri saran presints aministradôrs, politics e dipendents dai ents comunâi, son stâts ancje invidâts ducj i sindics cjargnei e scuasi ducj i politics elets. I rapresentants dal grup ai fasin savê che lis lôr iniziativis a son viertis a ducj chei che a vuelin impegnâsi intes cuestions sociâls, culturâls e ambientâls dal moviment.