NOTIZIARI NOVEMBRE 2006

8 NOVEMBRE 2006 

ALTE FURLANE - Lavôr: Fiom Cgil a Rome

Ancje la FIOM CGIL de Alte Furlane à partecipât a Rome ae manifestazion cuintri la precarietât e pai dirits sociâi. I metalmecanics e, pal plui, dut il mont dal lavôr al patis i dams de precarietât che e oblee i zovins a insigurece e a paiis bassis.

In detai manifestants ai domandin l'abrogazion di trê leçs, calcoladis cetant ofensivis de dignitât dai lavoradôrs e cause di inciertece e precarietât; prin di dut, la leç Biagi, che e samee vê slargjât in mût esagjerât chestis dôs robis; la Bossi Fini che, peant il permès di permanence al lavôr, e impon ai lavoradôrs forescj la sotanance a dite e, infin, la leç Moratti, par un just dirit al studi inte scuele publiche.

Cheste manifestazion, che e à viodût la partecipazion ancje di chei altris sindacâts, e cor il riscjio però di cjapâ significâts che no àn nuie a ce fâ cu lis resons di fonde di cheste iniziative, cemût che al è za sucedût tai diis stâts, cuant che, intune inserzion di un gjornâl nazionâl lis ideis dai Cobas si son mostradis tant che une clare, insopuartabile e violente dade jù di critichis a chei altris sindacâts e a un Ministri de Republiche, adun cu la domande di inviâ la crisi di Guvier, doprant cussì la manifestazion cuintri la precarietât in maniere dal dut deformade.

CJARGNE - Une filiere bosc-len-energjie

Si è da pôc fat il prin incuintri de taule di lavôr, coordenade de Regjon Fvj, che e cjape dentri la Comunitât montane de Cjargne, Len Servizis, il Consorzi boscs cjargnei, i Ispetorâts ripartimentâi dai boscs, la Aiel e chês altris 3 Comunitâts montanis pe metude in vore de filiere regjonâl bosc-len-energje. «La metude adun di un grup di lavôr pal svilup de filiere - al sclaris Luigi Cortolezzis, vice president de Comunitât montane de Cjargne e assessôr ai boscs - si met dentri di un program di coordenament di dutis lis realtâts del setôr par secondâ la produzion di energjie rinovabile e par furnî un jutori aes ditis che lavorin intal cjamp forestâl e in chel de prime lavorazion, cun pussibii bogns risultâts seti su pe ocupazion che su pe diminuzion des tarifis». La Comunitât montane e sta cirint za da timp di pocâ a pro de energjie rinovabile. Par chest si stan inviant 7 centrâls a len pal riscjaldament e pe produzion di energjie eletriche. Pe gjestion dai implants e par inviâ gnovis iniziativis a si cjaparan dentri ancje la societât EnergyMont, inmaneade da pôc de Comunitât montane, e la gnove societât Esco, che si metarà sù in curt e dulà che ai son stâts invidats a partecipâ ducj i Comuns cjargnei e chês altris trê Comunitâts montanis.

REGJON - I lâts vueits no zovin al turisim 

«I lâts vueits no coventin al turismi». Chest ce che ai àn pandût i conseîrs regjonâi Maurizio Salvador de UDC e Renzo Petris dai DS, che su chest argoment ai àn presentât une interogazion. «Inta nestre regjon - ai disin Salvador e Petris - si cjatin lâts artificiâi creâts par produsi energjie eletriche o tant che risierve di aghe. Chescj lâts, cul passâ dal timp, ai son deventâts pardabon atrativis turistichis, tanche a Sauris, a Barcis e a Verzegnis. Intai ultins agns - a zontin i doi conseîrs regjonâi - la gjestion di chescj bacins a è lade a sdavàs, mostrantsi masse pôc interessade aes esigjencis turistichis, cuntune schirie di disvuedaments (ancje di dut il bacin), durâts in cierts câs ancje cetantis setemanis. Chescj fats a provochin no pocjis pierditis economichis pai paîs interessâts".

Par Salvador e Petris dut chest «a fâs sì che si inviino intervents di metude in sest che no coventin, impen di savê sfrutâ (da bande des societâts sore chescj implants) miôr la risorse aghe». Cun di plui i conseîrs impensin che «une volte, prime che l'Enel cedès lis concessions a Edipower, inta Zonte regjonâl si cjatave un organisim di pueste pe conciertazion, che frontave ducj i problemis peâts ai rapuarts Regjon, ents locâi e societâts di gjestion ".

I doi conseîrs ai domandin duncje che la Aministrazion regjonâl a cjapi posizion su cheste cuestion «tignint cont dal impuartant program di promozion dal turisim furlan, indreçât ae valorizazion des sioretâts ambientâls dal nestri teritori».

10 agns di cooperazion sociâl pe salût mentâl

Une zornade plene di significâts - no dome simbolics - chê che si fasarà a Udin tai diis che ai vegnin. "10 agns di Cooperazion sociâl pe salût mentâl", chest il non dât a une schirie di manifestazions. Lis Cooperativis sociâls Itaca e 2001-Agjenzie Sociâl son jentradis pe prime volte a Sant Svualt (il vecjo manicomi di Udin) il 15 di Lui dal 1996. Il mandât a ur jere stât dât sù dal locâl Dipartiment di salût mentâl par finî di sdrumâ ce che a restave da organizazion dai vecjos manicomis, judant la riabilitazion e tornant a dâ une altre pussibilitât a centenârs di personis inmò presints intai reparts. L'assum des dôs societâts al jere chel di inmaneâ struturis residenziâls e servizis di integrazion sul teritori. La leç 180 dal 1978, e à puartat un aiar gnûf, ancje se and è volût timp par rigjavâ i prins risultâts.

Dîs agns ai son passâts da chel 1996 «e la Cooperazion sociâl e è stade une des fuarcis che e àn cambiât il mût di viodi il mont dai malâts di gnervs - disin Itaca e 2001 Agjenzie Sociâl. Cul otiche di inviâ azions e soluzions che a nos fossin chê dal internament, al è stât viert il Parc di Sant Svualt e si son metûts in vore, adun cul personâl dal Dipartiment, percors di vite plui adats e umans aes personis che si indrecìn ai servizis de salut mentâl».

Subit in vore i 7 gnûfs Comitâts de Proprietât coletive

A Priole e Nearis si è fate la prime riunion dal gnûf Comitât pe Aministrazion dai Bens civics. Lis votazions si son davuelzudis domenie ai 29 di Otubar tal istes timp cun altris 6 Proprietâts coletivis furlanis. Intai 2 paîs la partecipazion a stade buine cun 147 votants su 216 che ai vevin dirit. Lis preferencis (71) a son ladis al president jessint Riccardo Quaglia. Cun lui ai son stâts clamâts a lavorâ Mauro Chiapolino (64 preferenciis), Graziano Riolino (62), Gian Pietro Valle (61) e Manuel Quaglia (60). La afluence aes votazions a è stade grande ancje a Davaste di Davâr, dulà che ai àn votât 87 su 131. I Comitâts ai voressin di dasi dongje pe elezion dai lôr presidents dentri di 30 diis.

Fieste dai arbui 

La metude in vore dal progjet (cu la colaborazion de Associazion Forestâi di Italie - sezion dal FVJ) "Intitulazion des plantis" a va indevant benon simpri cun l'obietîf di valorizâ i boscs da nestre regjon e di fâ nassi intai zovins l'amôr e il rispiet pe nature. Cheste ativitât (studiade ad hoc par ogni zone) e à il so pont di fonde inte intitulazion a personaçs e aes scuelis (o, in cualchi câs, ancje a classis ugnulis) di une plante, picjant sù une targhe cul non sientific e il non de scuele o de classe. Oltri aes scuelis e ai personaçs, a vegnin cjapats dentri diviersis istituzions (seti civîls che religjosis) dal teritori, fasint cussì in mût che cheste ativitât a no seti dome indreçade a categoriis particolârs o privilegjadis (par esempli ai fruts des scuelis), ma a cjapi dentri dute la comunitât. L'ativitât a fâs part dai compits dâts a nestre Direzion dal Plan regjonâl di Svilup 2006 - 2008 (fat bon dal Consei Regjonâl il 27 di Zenâr dal 2006) e a sprolungje lis iniziativis za inmaneadis intal Bosc dal Prescudin (in provincie di Pordenon), intal Bosc Romagn (dongje Cividât) e intal parc des Dolomitis furlanis (in comun di For Disot); in cumò l'ativitât e à stade davuelzude intal Bosc di Premos (in comun di Paluce) e intal Parc des Prealps Juliis (tal comun di Resiute). Chestis manifestazions a nos dan dome un sburt par valorizâ lis diviersis zonis gjeografichis, ma a fasin rifles ancje su pes diversitâts biologjichis (seti plantis o bestiis) che insiorin la nestre regjon. Mediant che no son inmò prontis lis targhis uficiâls in metal, par intant si son dopradis chês in len, cence altri plui bielis ma, magari cussì no, plui delicadis a stâ difûr, e inalore destinadis a jessi cambiadis a pene prontis chês altris.

PALUCE- Kickboxing, vitorie par Esposito

Andrea Esposito de Cjargne Kickboxing di Paluce al à dominât inte sô categorie (- 65 kg , cinturiis marons e neris) al 5 trofeu nazionâl di kickboxing, fat a Puegnago sul Garde. Buinis ancje lis prestazions dai coleghis di club Federico Battain (+ 80 kg , cinturiis zalis, narançons e verdis) e Michele Muser ( -70 kg , stesse cinturie), ducj i doi ae prime esperience te specialitât.

Damâr – Cuintri la Fibrosi cistiche, cjapâts sù 1.405 euros

Lis zornadis di sensibilizazion par bati la Fibrosi Cistiche , fatis a Damâr aì dal Centri comerciâl dal 28 al 29 di Otubar stât, si son sieradis cun 1.405 euros di ufiertis. Bêçs, che, saran destinâts seti a ricercjie scientifiche, seti a struments e medisinis pai fruts ricoverâts.
La Associazion Fibrosi Cistiche dal FVJ, i piçui malâts e lis lôr fameis a ringraziin di cûr ducj chei che, in cualsisei maniere, ai àn dât un contribût a cheste iniziative.

HALLOWEEN: americanadis di impuartazion

Ancje chest an, tante de nestre int a pensât ben di copiâ i stupideçs che i americans, magari cussì no, a fasin inte dì dai Sants. Son nainis che nos àn nuie di rispietôs o di sacrât e che a pretindin di cjavâsi fûr da tradizion celtiche e paiane, une tradizion no provade e, se propit a fos rigjavade, a sares stade recuperade cussì mâl che plui no si po. Une cavoce disvueidade cuntune cjandele dentri al jere dome un mateç di canais, cun nissune pretese di significâts platâts. In dì di vuê, tante int a pues, cuntun tic di pete, impensâsi chescj puars zûcs dal prin Atom, imbastîts par spaurî lis frutis e fâ sbalsemâ lis vedranis. Cumò ai volaressin doprâ une cavoce par memoreâ i nestris muarts, cence rindisi cont che lôr no àn dibisugne di chestis matetâts, che dal sigûr no vignin fûr di personis saviis e poiadis. Cemût che za a pant benon la peraule, a son dome americanadis che a stan cjapant pît dapardut, intun mont simpri plui globalizât, dulà che a samee che il mût di fâ american al seti deventât une leç. E da cemût che al va il mont, cui che a nol va daûr a cheste leç al è un biadaç. Impen, pal nestri pensâ, biadaçs son chei che a seguissin dutis lis modis cence fermasi mai a pensâ e domandâsi il mutîf des robis, ma cjapant sù dut ce che barbe Sam al mande dai Stâts Unîts.

Tumieç - Leturis pai fruts inte biblioteche

Miercus ai 8 di Novembar, inte biblioteche di Tumieç ai tacaran i incuintris di leturis pai fruts. Chescj apontaments si fasaran ducj i miercus fintramai al 31 di Zenâr dal 2007 (fûr che il 3 di Zenâr), a partî des 17.30 dopomisdì.
La prime mieze ore sarà pai fruts dai 3 ai 6 agns, biel che la seconde lis leturis a saran indreçadis ai plui grancj (dai 7 ai 10 agns). Ben si intind che ducj ai son invidâts a partecipâ. Cheste iniziative a è stade inmaneade da un grup di volontaris passionâts di libris, che ai dan il lôr timp e lis lôr cognossincis par stramandâ a canaie il gust de leture.