14 NOVEMBRE 07
Provincie 5mil euros a pro de Associazion "Barbara Onlus"
Cinc mil euros intun societât come la nestre e podin forsit sameâ pôcs, ma intun paîs jenfri i plui puars dal mont e cuntun nivel di analfabetisim che al rive a tocjâ il 50% pai oms e al passe il 60% pes feminis, dal sigûr a puedin fâ la difarence. Chescj a son i bêçs butâts fûr dal assessorât aes politichis sociâls de Provincie di Udin a pro de associazion "Barbara Onlus" che in Costa d'Avorio e à decidût di fa sù une asîl. La presentazion si è davuelzude a Palaç Belgrât ae presince dal assessôr aes politichis sociâls Adriano Piuzzi e dal president de associazion "Barbara Onlus" Renato Feruglio. Piuzzi al à marcât cemût che « la Provincie e vebi supuartât cheste iniziative inte crodince che al sedi un contribût indreçât benon, che al coventarà a meti in vore un progjet no assistenziâl ma che al ponte al doman di chê int, dantjur la pussibilitât di vê e doprâ une struture prime dal dut inesistent. Un progjet mertevul - al à sierât - che la Provincie no podeve no sostegni cuntun contribût sprolungjant chê strade inviade timp indaûr: in fats in Avrîl il consei provinciâl al veve za votât ae unanimitât la butade fûr di 10 mil euros pe associazion di volontariât Raffaele Piva Fund par une scuele a Walasgala, dongje Tangalle in Sri Lanka».
CJARGNE - Ss52bis, pronts i contribûts pe sigurece
Ae prossime riunion dal Cipe il Ministeri des Infrastruturis e fasarà bon un progjet par cantîrs dal Anas da inviâ in FVJ. In detai, si trate di un intervent su pe Strade statâl 52bis Carnica, in provincie di Udin, cun lavôrs di retifiche planoaltimetriche e la fin dai lavôrs dilunc il toc de ex galarie di Neariis. I fonts a son stâts butâts fûr daûr dal articul 7 dal decret di leç 159 de finanziarie, bêçs che a scuegnin jessi spindûts dentri di chest an 2007 e che duncje a son za pronts par inviâ in curt i lavôrs. La sielte des gnovis oparis da finanziâ e je stade decidude su la fonde dal stât in ore presint dai lavôrs, cun atenzion par chei che a rivuardin la metude in sigurece des infrastruturis. «Cun chest intervent – al à dit il Ministri des Infrastruturis, Antonio Di Pietro – cirin di miorâ la sigurece suntune impuartant strade. I fonts a saran daurman metûts a disposizion par partî subite cui lavôrs».
TUMIEÇ - Pediatrie e ostetricie a mudin sede
La Direzion de ASS3 Alte Furlane e fâs savê che, colpe i lavôrs di ingrandiment e metude in sest dal ospedâl di Tumieç la pediatrie la ostetricie e mudaran - par ore - sede. La pediatrie e à za spostât cualchi ambulatori e cualchi servizi; in detai i ambulatoris (divisionâl, urgjencis EEG e neuropsichiatrie dai fruts) a son stât logâts al prin plan dal ospedâl, dongje de Aule Magne, impen simpri compagns a son i numars di telefon e i oraris. Il servizi di riabilitazion dai fruts al è stât spostât inte sede dal distret numar 2, in vie Carnia Libera 1944, al tierç plan. In chest câs al è mudât ancje il telefon che al è 0433-3443, i oraris invezit a son simpri chei. I studis dal primari e dai miedis a son stâts sistemâts al prin plan dal ospedâl, tal curidôr de ex anestesie. Cun di plui, si vise, che dentri de fin di Novembar e i prins di Dicembar si spostarà ancje la ostetricie, fûr che la ativitât ambulatoriâl che e restarà alì. I ricoveris di ostetricie e la sale part e saran logadis al prin plan dal ospedâl, dulà che za e jere la ex pediatrie, ancje il studi dal primari si spostarà achì, tal curidôr de ex anestesie, biel che i studis dai miedis a si spostaran te zone de ex Biblioteche al prin plan; ducj i numars di telefon e i oraris di ostetricie a restin compagns.
ÇONCOLAN- In març al torne il "Crazy Bob"
Il comitât organizadôr al fâs savê che ai 7-8-9 di Març dal 2008, e torne la mate manifestazion dal Crazy Bob, che e rive cussì al so 6 apontament, jentrant di dirit jenfri lis plui impuartants manifestazions regjonâls. L'event di garis su pe nêf cun trabicui metûts adun fai-da-te, idee sbarlumide ma gjeniâl di une grampe di amîs tal 2000, daspò de fermade dilunc il 2007, e tornarà dongje a tirâ dongje sul Çoncolan passionâts dal estrôs ma san divertiment invernâl. Si invide duncje a tornâ a meti in moto il çurviel par inventâ gnovis ideis, par pandi lis propris capacitâts di inzegnerie, creativitât e matetât, a tornâ a vierzi lis sierandis dai garage, dai laboratoris e cjanivis e tacâ a inventâ, costruî e colaudâ i mieçs che a vignaran jù tal circuit dal Crazy Bob. Pai trê dîs il comitât organizadôr al vise che 'nt saran cetantis novitâts parcè che a rivuarde i events che a insioraran la corse, jenfri chescj un grant radun di mongolfieris in cuote.
Un an avodât ae Femine e al so mont
Un an par contâ la femine tai diviers aspiets de sô vite: dal lavôr ae famee, al sociâl, ae politiche. Lu à, in curt, pandût la delegade pal assessorât aes paris oportunitâts de Provincie di Udin, Valeria Grillo, ospit de Cunvigne inmaneade adun cul Cif (Centri Talian feminîl) regjonâl a palaç Belgrât. Tantis lis iniziativis che à an rapresentât il spirit dal assessorât dilunc l'An european des Paris Oportunitâts che al è sul finî. «O vin volût frontâ i difarents aspiets de femine - e à dit - parcè che la Provincie da agns si impegne par sensibilizâ la comunitât aes paris oportunitâts par ducj». A començâ de femine e de sô salût, cul mês in rose, la che «l'assessorât al à volût supuartâ la Lilt , la Leghe italiane cuintri i tumôrs, e lis impuartants iniziativis par fâ partecipâ lis feminis - e e à continuât - che dispès pai tancj impegns di lavôr e famee si lassin lâ, ae impuartance de prevenzion par scjampâ o curâ cun plui costrut chestis malatiis». Si è lâts po dopo indevant cul rapuart tra feminis e politiche cul scandai fat su pes feminis aministradoris publichis de provincie. «Des rispuestis des coleghis - e à marcât la Grillo - al è vignût fûr cemût che lis feminis in politiche a son inmò pocjis e dispès no vegnin a lôr dadis sù lis deleghis che a meretaressin pe lôr preparazion, che in medie, e je une vore alte».
Mandi Giorgio Ferigo
Giorgio Ferigo, scritôr, studiôs, musicist, al è muart tal ospedâl di Tumieç, dopo une curte e disgraciade malatie. L'inteletuâl al jere nassût tal 1948 a Comelians, laureât in midisine a Padue, al à simpri lavorât inte sanitât "publiche" in Friûl: prime a Udin tant che miedi dal lavôr (par tancj agns aes scuarçariis di Cogolo di Çuian meretantsi la stime e la fiducie sedi dai operaris che dai sorestants), par dopo vegni sù inte sô Cjargne, a Comelians, o lavorant a Tumieç, dulà che al à continuât il so mistîr di miedi dal lavôr igjenist. Autôr di cetancj libris, cjançons, saçs, studis, i siei interès a passavin de storie ae culture popolâr, ai cantins de sanitât e de igjen, da musiche al cine, ae leterature. Jenfri i siei ultins lavôrs il libri "Il Certificato come sevizia" publicât de Forum: un libri di denuncie des assurditât dal Bielpaîs che a oblein i miedis e certificâ ce che certificâ no si pues, e la int a paidî. Ferigo al è stât par tancj agns animadôr dai Circui culturâi de Cjargne (in curt al jessarà un so libri sul Tiliment); al è stât fondadôr dal Povolâr Ensamble, un grup musicâl dai agns '70 fat la plui part di padoans che a cjantavin in cjargnel su tescj scrits dal stes Ferigo, al à colaborât cul Ministeri de Sanitât e cu la Regjon pe semplificazion burocratiche aministrative di mil adempiments e pe semplificazion dal cuadri legjislatîf; al à colaborât ancje cul Universitât di Udin e cu la Coldiretti par inviâ la prime leç su pe ricualificazion fondiarie de mont dal FVJ; di pôc si ere interessât adun cu la Confartigianato dal probleme des cjasis bandonadis e a sdavàs.
Pantianins: inmaneât l'Infopoint "Casa del Sidro"
Un pont di riferiment regjonâl pe promozion de produzion di mêi e derivâts. Al è stât inmaneât vuê a Pantianins, e logât par ore in vie Caterina Percoto 4, sede de Pro Loco, il gnûf Infopoint "Casa del Sidro", al sarà un spazi espositîf permanent, e un lûc par aprofondî la cognossince dal setôr ancje dal pont di viste tecnic sientific. «Cussì e devente realtât la dibisugne dai produtôrs - al à marcât l'assessôr ae agriculture Mario Strazzolini - di podê vê un spazi di pueste inte nestre regjon che al sedi un pont di partence pe promozion dal setôr produtîf, che al à potenzialitâts cetant grandis, e tant che centri atratîf dal setôr dal mêl, massime dai derivâts, par dute la regjon. Cun cheste inaugurazion, dopo il stazâmint des aziendis e la promozion dal bol di aree, jonzin un altri impuartant obietîf intal progjet Interreg III A Italie-Austrie "Mele senza frontiere", cun a cjâf la Provincie e cul cûr a Pantianins, centri ancje teritoriâl". La Provincie di Udin - al è lât indevant Strazzolini - e à dât sù la gjestion dal Info point ae Pro Loco de zone, soci di progjet e associazion che pai siei fins istituzionâi di disvilup e promozion dal teritori e je stade stimade adate pes ativitâts da davuelzi inte struture».
Provincie: viers un protocol di intese jenfri Udin e TimiSoara
I rapuarts economics tra lis Provinciis di Udin e Timisoara e la firme di un protocol di intese che al ponti a infuartî la posizion des ditis furlanis inte plui moderne aree de Romanie a son stâts il cûr di un incuintri volût dal assessôr provinciâl udinês ae agriculture Mario Strazzolini jenfri i presidents de provincie furlane e rumene, Marzio Strassoldo e Constantin Ostaficiuc. "A son in continue cressite i rapuarts tra i nestris doi teritoris - al à notât il president Strassoldo - e al è duncje cun interès che la nestre provincie e cjale a chê di Timisoara. Il doman des nestris economiis al è simpri di plui fondât su la cooperazion, su pe cognossince des rispetivis risorsis e problemis". La riunion e je seguitive a un viaç inmaneât propit da Strazzolini a Timisoara e che al cjapave dentri i rapresentants des categoriis economichis de provincie di Udine. "Tornâts dal viaç - al à sclarît Strazzolini - o vin inviât i uficis par che a metin adun in curt un document che al permeti aes nestris provinciis di meti in vore subite une forme coordenade di colaborazion".