|
"Eletrodot: viers un svilup sostignibil" Eletrodot in Alte furlane? Sì se sot tiere, in armonie cul ambient e aministrât adun cul teritori. In struc, chest il pinsîr de Margherita furlane su pal probleme dal eletrodot vignût fûr tant de riunion, inmaneade dal Circul de Margherita de Val dal Bût, fate a Paluce, cu la presince dai aministradôrs locâi dal teritori, de int, dai coordenadôrs provinciâi e regjonâi de Margherita Spitaleri e Pertoldi, dal Assessôr regjonâl Marsilio e dal President de Comunitât Montane Not. L'ocasion di confront a è tacade cul sclariment dal stât - da bande dal president Not - dai procediments che ai rivuardin i progjets presentâts dal grup Pittini-Fantoni e da Burgo e la presentazion dai prins risultâts de taule tecniche jenfri Regjon e Comunitât Montane, che in gracie dal assum di ducj i sogjets cjapats dentri e sta dant i prins risultâts. La Margherita furlane, par bocje dai coordenadôrs, provinciâl Spitaleri e regjonâl Pertoldi, e à ribatut la sô posizion no contrarie a metude in vore dai implants pe energjie e la dibisugne che chescj a setino indreçâts al interès gjenerâl, cul consens des comunitâts locâls tocjadis, clarementri, dopo de verifiche de compatibilitât cui programs di svilup dal teritori, inmaneâts dal Assessôr regjonâl Marsilio, e cu la salut da int.
Strabogns risultâts par "Fruts intal Museu" e pai "Centris estîfs" Passe 260 fruts ai àn vût part, cheste istât, aes iniziativis di animazion inmaneadis da CjargneMuseus, la rêt musiâl de Comunitât montane de Cjargne. I 2 progjets, clamâts "Fruts intal Museu" e "Centris estîfs", ai àn viodût la partecipazion di fruts e fantats no dome cjargnei ma vignûts dongje da dut il Friûl e ancje da fûr regjon. "Dutis dôs lis propuestis - al sclaris Marino Corti, assessôr ae culture de Comunitât montane de Cjargne - son stadis metudis in vore cul fin di indreçâ i fruts ae storie, ae culture e ae art di cheste zone, a mieç di un grum di ativitâts seti educativis che di zûc, imbastidis dal personâl di CjargneMuseus tai museus de zone. Grant sucès massime pal progjet "Fruts intal Museu" che, dentri dal meis di Avost, al à viodût la presince di 200 fruts, vignûts da dute Italie. A è stade une ocasion cetant impuartant, pe canaie, di podê cognossi miôr il teritori e, par chei che a vignivin di fûr, di podêlu pandi intai siei aspiets storics e culturâls". La iniziative "Fruts intal Museu" a si è davuelzude aì dal Museu da Grande Vuere di Tamau, intal Museu archeologjic di Zui, inte Galarie di Art Moderne di Trep, tal Museu Gjeologjic di Dimpeç, in chel di Preon e, alfin, al Museu di Arts popolârs di Tumieç. L'animazion dai Centris estîfs, cu la partecipazion di une sessantine di fruts, a è stade fate intai museus di Tamau, Trep, Zui, Verzegnis, Preon e Dimpeç.
Destinâts de Regjon 850mil euros Ai tacaran tai meis che a vegnin i lavôrs pe metude in vore dal prin toc dal "laboratori pe inovazion e certificazion de procedure produtive e struturâl dal len", ideât da Agemont, la Agjenzie pal svilup economic de mont, che a si cjatarà dentri dal Centri di Inovazion Tecnologjiche dal Agjenzie, a Damâr. La Regjone FVJ, dentri de leç regjonâl 12 dal 21 di Lui dal 2006, "sestament dal belanç 2006" e à, di fat, stanziât 850mil euros fasint buine la creazion di une convenzion cun Agemont pe metude in vore de struture, autorizant la spese pa l'an 2006. "L'inviament dal laboratori - al dîs Alberto Felice De Toni, president de Agjenzie - al sarà un mût di vê sul teritori regjonâl un centri ugnul a livel nazionâl che al permetarà aes dites di pocâ la produzion, pandint il slargjament di prodots di len cun particolaritâts tecnologjichis e struturâls certificadis". Il progjet, metût adun de Agemont cu la Universitât di Udin, al è poiât ancje da Assindustrie de provincie di Udin e dal Catas (Centri ricercjis svilup e laboratori di provis setôr len), cu la zonte, intun secont timp, di Federlen-Furniments.
La leç su pe metude in sest fondiarie e funzione Chel di Enemonç al è un esempli di cemût che la leç regjonâl su pe inovazion a seti zovevul e a produsi torneconts ancje e agriculture, massime in mont la che a 'nd è plui problemis par chest setôr. Chestis lis peraulis dal assessôr regjonâl, Enzo Marsilio, tant di une passade a aziende di Enemonç Cjargneagricule, par viodi il gnûf imprest par molzi (un dai trê che ai son in Friûl). Il sisteme di chest machinari al ponte su un computer e un laser che ai instradin l'imprest par dut il timp dal molzi. Midiant un microchip metût dentri intal golâr a vegnin marcadis lis carateristichis de bestie e segnâts i timps par molzile dentri di une zornade, in plene libertât, cence sfuarçâ a oraris fissâts, sfrancjant l'om dal jessi presint inte stale. Su la cjarte il lat al podarès jessi lavorât e fintremai imbutiliât sul puest (tignint cont dal fat che se la vacje e à pecjis a ven a colp metude sot control). "Chest - al à dit Marsilio, che al ere compagnât dal diretôr centrâl des Risorsis Agriculis de Regjon Augusto Viola - a fâs sì di podê lassâ al om une plui grande elasticitât di oraris, miorant cussì la sô cualitât de vite". E Marsilio al à cussì sierât: "Cu lis leçs su pe inovazion e metude in sest fondiarie vin dât a agriculture di mont doi struments impuartants che, dal sigûr ai daran snait al svilup, podintsi peâ - cun di plui - al setôr turistic e de protezion dal ambient".
Tesini al à memoreât la figure di Bruno Lepre Il president dal Consei regjonâl Alessandro Tesini al à impensât il senatôr Bruno Lepre, muart a Tumieç sabide ai 16 di Setembar, a 86 agns. Fasint il struc de storie de sô vite, a partî dai studis di leç e dal so mistîr di nodâr, continuât ancje dilunc lis 5 legjislaturis dulà che al ere stât elet, a Cjamare dai Deputâts dal 1968 al 1972 e po dopo al Senât dal 1972 al 1983 cun diviers assums di Guvier, puartant indevant il so leam cul Partît socialist, tacât prime de sô elezion in Parlament, Tesini al à ribatut il fâ fuart di Lepre, in Provincie, pe creazion de Universitât di Udin, ta crodince che cheste a podès deventâ stimul impuartant par dut il Friûl e massime pe mont furlane. Tal 1993 al jere elet Conseîr regjonâl. "Ancje achì Bruno Lepre cun savietât e judizi a si è dât da fâ pe sô tiere" - al à dit Tesini, zontant che "intai siei intervents, pulîts, cence stupideçs, al marcave cemût che in mont ‘di vert a si mûr', val a dî che cheste zone e no à dibisugne dome di jessi tignude da cont ma ancje fate cressi e svilupâ".
Domande par un eletrodot sot tiere La societât Alpe Adria Energy Line SpA cun sede a Verone e à depositât in Regjon une domande par otignî il permès di meti in vore un eletrodot sot tiere di 132 KV e 140MWA. Lu fâs savê l'assessôr regjonâl ae energjie Lodovico Sonego. La merchant line e pearès Würmlach a Paluce (aì de cabine SIOT) cuntune lungjece ator ai 20 chilometris. Il progjet presentât al cjape dentri seti la part taliane che chê todescje. Jessint sot tiere la struture no vorà dibisugne di nissune valutazion di impat ambientâl. Stant che la tension a è mancul di 150 KV l'autorizazion a sarà dome regjonâl a mieç di une conference di servizis dade dongje di pueste.
Buinis gnovis pe candidature des Dolomitis tant che patrimoni dal Unesco Samee che ancje l'ultin esam al seti stât passat benon. La metude dentri des Dolomitis furlanis te liste dal patrimoni mondiâl dal Unesco, di fat, daspò da passade dal professôr Gerhard Heiss, studiôs dal Union mondial pe nature, a podarès jessi plui dongje. Compagnât dal assessôr provinciâl a mont Vittorio Caroli, dai aministradôrs locâi dai 6 comuns cjapats dentri intal progjet (Dimpeç, For Disore, For Disot, Soclêf, Sauris e Prât) e dai rapresentants dal Ministeri dal Ambient, e dal Museu furlan di Storie Naturâl, il professôr Heiss al à stazât la zone dal mont Bivera, esaminant cui siei voi lis carateristichis pandudis intal dossier metût adun par mutivâ la candidature. Heiss, dopo ve vût sclariments sul progjet, al si sarès sorestât devant de bielece des Dolomitis furlanis e dal ambient inmò salvadi. "La iniziative che a viôt la partecipazion seti de Provincie di Udin, seti di chês di Belun, Trent, Bolzan e Pordenon - al à sclarît l'assessôr Caroli - e domande il ricognossiment di dute la zone des Dolomitis tant che aree Unesco, cjapant dentri ancje il Parc des Dolomitis furlanis e zontant i lûcs dal Bivera e da Val Pesarine". Cumò la comission a si darà dongje jenfri Fevrâr e Març pe valutazion finâl e la metude jù di un document. In dut câs la risoluzion a no vignarà prime de metât dal 2007.
Sportel plurilinguistic di gnûf in vore a Paluce. Il 2 di Otubar stât, il sportel plurilinguistic di furlan e timaveis, in gracie a leç regjonâl 482/99, al è tornât in vore, al secont plan dal municipi di Paluce. I oraris di vierzidure ai son: la buinore ducj i diis dal lunis al vinars des 10 a 12.30, e ancje intal dopomisdì dal miercus des 3 aes 5 e di joibe des 3 aes 5.30. I sporteliscj ai dan conseis e jutoris a vôs e par scrit a int, aes scuelis e aes associazions par dut ce che a rivuarde corezions e revisions di scrits par furlan e timaveis, par publicazions bilengâls e ai tegnin cont de biblioteche comunâl, che a cjape dentri, in plui che studis di ambît locâl, ancje tescj di leterature in lenghe furlane. L'intenzion dai sporteliscj no è dome chê di tignî vivis lis nestris lenghis ma fâ in mût di pandilis e tegnilis da cont a mieç di ricercjis su pe toponomastiche e la storie locâl. Aì dal sportel pe lenghe furlane podès cjatâ Laura Lazzara e Sara Maieron, biel che pal timaveis si indrecisi a Cinzia Muser.
DARTE - passade di Illy al stabiliment termâl L'ambît termâl al sta simpri di plui cjapant un puest une vore impuartant tal setôr de ufierte turistiche e al sta dopleant i servizis, indreçâts no dome aes curis termâls ma ancje al estetiche e al relax cu la metude in vore di "Centris di benstâ". Ancje il centri di Darte al sta cjapant cheste strade e achì il president de Regjon Illy al è passat adun cul assessôr a Mont Enzo Marsilio. Insieme cul sindic, Giovanni Battista Somma, il president al à dât un cuc seti aes tradizionâls curis termâls seti al Centri di benstâ Aquadea inmaneât intal Avrîl stât, e a si è fermât soredut tal tierç stabiliment, in costruzion, dulà che ai son previodûts un centri pe riabilitazion in aghe termâl, pissinis, saunis e un bagn turc. Cun di plui, pe cressite turistiche di Darte al è in progjet un albierc a 5 stelis, unic in Cjargne. Tai programs dal president Illy e dai aministradôrs locâi la metude a puest e il svilup des struturis di Darte, dal Zoncolan e de aree archeologjiche di Zui ai son i ponts di fonde di une gnove ufierte turistiche pe Val dal Bût e di dute la Cjargne. Provincie: 21 mil euros aes associazions di Maian La zonte provinciâl di Udin e à da poc fat buine la dade fûr di une schirie di contribûts aes associazions di Maian, par un totâl di 21 mil euros. Lu à fat savê l'assessôr provinciâl aes Politichis Sociâls, Adriano Piuzzi. "Inmò une volte la Provincie di Udin a pant il so interès par cheste zone, dant impuartance aes ativitâts davuelzudis des associazions locâls". In detai, 6 mil euros ai son pe associazion Avulss Onlus cul so progjet di agregazion pai zovins che al à cjapat dentri ancje zoventût de Gnove Guinee e dal est european, 3 mil euros ae associazion "Nosti doman" pe vierzidure di une struture a Pêrs e 4 mil par iniziativis programadis dilunc l'an. "Chei altris bêçs - al spieghe Piuzzi - ai son lâts al assessorât al sport (3 mil pe Associazion sportive Maianese pes spesis da lôr vudis pal Campus Volley, che al clama dongje cuasi 130 fruts) e al assessorât ae culture (5 mil euros pe Pro loco, che e à inmaneât il “2 Premi Citât di Maian” fasint un catalic pe mostre di Cesare Mocchiutti)". "Chescj contribûts - al à sierât Piuzzi - ai vuelin premiâ il lavôr des associazions che as àn savût fasi cognossi pai programs inmaneâts".
|
