NOTIZIARI OTTOBRE 2006

18 OTTOBRE 2006  

Museus, incressi la Rêt provinciâl

Slargjâ la Ret provinciâl dai museus, cjapant dentri ancje lis struturis plui piçulis e imbastî un grup di studiôs par podê meti in vore adun lis manifestazions indreçadis a memoreâ la nassite de Patrie dal Friûl. Chescj, in curt, i argoments discutûts tant dal incuintri jenfri il delegât a culture e aes politichis linguistichis, Valeria Grillo, i assessôrs a culture dai Comuns e i diretôrs dai museus provinciâi. "Chest incuintri al covente - a à sclarît la Grillo - propit par capî se il slargjament da Rêt musiâl a seti une robe fatibil". La Provincie di Udin, in gracie a un document sotscrit l'an passât, e à dât dongje un organisim par cualificâ il patrimoni esistint in ducj i museus; pandi la cognossince dai museus e di ce che ai àn dentri, dopleant cussì il numar dai visitadôrs; valorizâ il patrimoni artistic provinciâl, secondant il scambi di ideis jenfri i museus. A mieç de Rêt musiâl a si pues coordenâ la promozion di ativitâts, inscuelâ il personâl, inviâ progjets indreçâts a puartâ lis struturis avuâl ai livei minims dai criteris tecnic sientifics nazionâi. Cun di plui, il protocol al permet di miorâ la cualitât e la cuantitât; spartî lis risorsis e sigurâ, aes istituzions cjapadis dentri, di vê servizis che ai judino: la cressince da ufierte musiâl dal teritori, il scambi di informazions o di materiâi e la promozion di itineraris.

Par ce che a rivuarde il 3 di Avrîl, fieste de Patrie dal Friûl, la Grillo a sclaris: "Volin fâ in mût che, in che dì, ducj i Comuns ai clamino i lôr Conseis comunâi a une sedude straordenarie, ai metino fûr la bandiere dal Friûl e ai pandino il concors indreçât ai fruts des scuelis elementârs e mediis "Disegne la storie dal Friûl".

BOOK CROSSING ANCJE A PALUCE

Za di cualchi mês une biele iniziative e à cjapât pît a Paluce, aì da ocjalerie di vie Rome: il book crossing. Si trate in pratiche di un scambi di libris: si lasse aì un libri za let e si puarte a cjase un altri, che al devente to. Tancj aromai i volums di podê sielzi, soredut di narative contemporanee.

Feminis e mieçs di comunicazion

Studiâ la figure de femine butade fûr dai mass media par strapassâ brutis ideis inmò presints. Al sarà chest l'argoment de cunvigne "Feminis e media: ecuilibri di zenâr inte comunicazion", inmaneât de Cooperative Cramârs di Tumieç, aì da sale consiliâr di Verzegnis. "Ducj i mieçs di comunicazion - e spieghe Stefania Marcoccio, vice president de Cramârs - ai àn un rûl di fonde tal creâ e fissâ, inte int, l'idee di identitât maschîl e feminîl. In tancj paîs i mass medie a noi dan une rapresentazion juste e ecuilibrade dal mont feminîl: il pês des feminis intal mont ocidentâl al è cambiât cetant intai ultins 50agns, ma distès il mût di stimâ lis feminis, soredut tal mont de comunicazion, al è restât simpri peât al cantin dal desideri sessuâl o pôc di plui. Un mût stereotipât, avilint e dal sigûr brut di pensâ aes feminis". "L'apontament - e continue la Marcoccio - al è une ocasion di confront e scambi di pinsîrs jenfri studiôs, esperts di comunicazion, rapresentants des istituzions e par dute la int interessade al teme". La cunvigne e si met dentri intal argoment des paris oportunitâts, iniziative inmaneade de Cooperative Cramârs adun cun Forser Fvj, il Ial, l'Ires, il Consorzi pe imprese sociâl, lis Provinciis di Udin e Gurize, cul supuart de Regjon FVJ.

AGEMONT: inmaneâ il distret dal ICT

A 'nd è dibisugne di aprofitâ di spazis e oportunitâts par meti in vore il "distret dal Ict", che al podarès cjapâ dentri ancje il laboratori di microeletroniche pervasive e un centri servizis par rispuindi aes esigjencis des ditis montanis ativis intal setôr de eletroniche. Chest il struc de ricercjie di Agemont, vuidade e presentade da Alessio Nardini de Agemont, su lis PMI insedadis te provincie di Udin e Pordenon che e à metût in lûs, i dibisugnis des realtâts dal setôr e i problemis des impresis (cjatâ personâl cualificât, la fuart concorince, cjatâ finanziaments, fintremai a dificoltât di modernizâsi). Il studi al è peât al progjet filiere ICT, che al à tant che finalitât di meti in vore un centri servizis pes ditis dal eletroniche e dal ICT. Il progjet, di 3 agns, al à za vût un contribût regjonâl di 250mil euros l'an.

"I obietîfs dal progjet - al à dit, tant de presentazion, il president di Agemont, Alberto Felice De Toni - ai son chei di fâ cognossi al teritori la filiere, incressi la cooperazion jenfri universitâts e impresis e meti in vore un centri servizis pal setôr Ict".

"Il setôr al è rimarchevul - al à zontât De Toni - e al podarès jessi dopleât ancje in gracie dal distret Ict che al à 2 elements tirants: il laboratori di microeletroniche e il centri servizis". Dilunc la presentazion a son po dopo, stadis sclaridis lis propuestis di Gioacchino Nardin (un consorzi pal recupar e la eliminazion dai refudums eletronics) e di Giovanni Gambin (metude in vore di un desing center pe progjetazion di semicondutôrs).

La Cjargne e memoree Michele Gortani

Le stât il senatôr Giulio Andreotti la personalitât primarie a cunvigne "Michele Gortani, “Protagonist dal Nûfcent, figure di atualitât de mont dal 2000", fate vinars ai 13 di Otubar, aì da Sale Linussio inte caserme "Cantore", dulà che ai erin presints rapresentants dal mont politic, culturâl e academic par memoreâ, a 40 agns de muart, la figure di Michele Gortani, sienziât e om politic di prin plan pe Cjargne. "Cun cheste cunvigne - al dîs Lino Not, president de Comunitât montane de Cjargne - vuelin ricuardâ un dai personaçs plui rimarchevui inte storie de Cjargne, cjapant dentri, in cheste iniziative, ancje i zovins. Gortani, tant che studiôs al à colaborât cun istituzions sientifichis ma al à vût ancje un rûl significant inte politiche dantsi da fâ a livel nazionâl par indreçâ la metude in vore di leçs a pro dal teritori montan e pe fondazion, tal 1947, de Comunitât cjargnele la che al sarès stât president fintramai a muart. Il senatôr Andreotti al à testemoneât cetant che Gortani al vebi fat pe Cjargne e, in gjenerâl, pe mont. Testemoneance direte, jessint che Andreotti e Gortani ai àn lavorât adun inte Assemblee Costituent. L'incuintri al è lât po dopo indevant cui discors di Carlo Faleschini, Ermes Dorigo (autôr dal libri "Michele Gortani"), Domenico Molfetta, ex president da Fondazion Museu "Michele Gortani" di Tumieç, e di Novella Cantarutti, incargade da Gortani stes di mandâ fûr il so memoriâl. Il prin di misdì a si è sierât cu lis peraulis dal senatôr Andreotti. Dopomisdì a è stade fate la passade aì dal Museu cjargnel des Arts popolârs, inmaneât da Gortani intal 1963, e a mostre sul artesanât, a fin a è stade screade la opare, dal artist Gianni Passalenti, che e figure il sienziât, donade dal Rotary Club di Tumieç.

DARTE - "Friûlfonc" aì di Salon

Daspò dal grant risultât vût inte prime serade, a è lade indevant al ristorant Salon di Darte la 14° edizion di FriûlFonc, rassegne gastronomiche avodade a valorizâ e promovi i foncs. Il prin apontament si è tignût al ristorant Da Scarpan a Sant Danêl dulà che, sore a mangjâ bonissims plats di foncs compagnâts dai miôrs vins furlans, i partecipants ai àn podût gjoldi de presince di Giorgio Monte. Il famôs ator dal Teatrin dal Rifo, al à legrât la int cun plasevuls tocs teatrâi. Monte al ere presint ancje intal ambient di Bepi Salon, persone stimade tant che il sorestant das jerbis in Cjargne e il plui impuartant specialist in foncs dal Friûl. La manifestazion e larà indevant vinars ai 20 di Otubar al Ristorant Costantini di Cuelalt di Tarcint, sierantsi dal dut vinars 27 Al Paradiso di Pucinie. L'edizion 2006 di FriûlFoc è inmaneade de regjon FVJ, cu la colaborazion di Turisim Fvj, Cjargne Welcome e la Confcommercio.

Davâr - Contribût regjonâl ae Union Sportive

Il Consei Diretîf de Union Sportive di Davâr al à pandût grant gust pe buine gnove che, la zonte provinciâl, su propueste dal Assessôr ae Solidarietât sociâl Adriano Piuzzi, al à dât fûr un contribût di passe 1.200 € pes ativitâts dal Centri che dilunc l'Istât al à impegnât i fantats di Davâr intun grum di ativitâts. Trê setemanis di mateçs, gjitis, escursions, cu la prionte di une dade passade in malghe Arvenutis. Cheste stesse struture, in gracie di un altri contribût di 6.000 €, compagn al 75% de spese, è stade metude a puest cu la zonte dai furniments de cusine e di imprescj pe tignude da cont dal puest. I lavôrs, fats ancje a mieç dal grup ANA, ai àn fat sì che il lûc al seti deventât, pardabon, plui adat a dâ acet a trops di int, cemût che al è za sucedût tant de fieste sociâl da corâl "Chei di Guart". Cun di plui, in gracie dal Assessôr al Sport Fabio D'Andrea, la societât sportive e à vût 2.000 € par dâ snait a ativitâts ricreativis e sportivis.

Un cors par smeti di fumâ

Cors da Aziende sanitarie numar 3 par lassâ di fumâ. Par judâ cui che al à decidût di no fumâ plui, dal 20 di Novembar, aì dal Ospedâl di Glemone, al tacarà il 30° cors "A messit... par no fumâ plui". Il cors al si fasarà in 5 diis, da lunis al vinars, des 18.30 aes 20.30. Cui che al è interessât al pues clamâ al Dipartiment pes Dipendencis di Glemone al numar 0432 - 982312. Avîs sul cors, e su chês altris ativitâts a si podin cjatâ ancje sul sît internet dal Centri. Il tratament in grup al è un dai sistemis plui zovevui par molâ di fumâ. In dut cas a cu che al vûl, al ven proponût ancje un supuart medisinâl .

MONT - Promotur: "La nêf vignude jù a è di bon auspici"

"Sperin che la nêf vignude jù che a nol è tant a seti di bon auguri pe stagjon turistiche invernâl dal FVJ'': lu à dit il president da Promotur Luca Vidoni, sclarint di no crodi dome te cumbinazion, ma di pontâ soredut su gnovis iniziativis promozionâls e sul assum di ducj i sogjets interessâts par tornâ a meti in vore biel di corse la cabine dal Lussari.