NOTIZIARI OTTOBRE 2006

25 OTTOBRE 2006  

25 mil euros dâts fûr de Provincie pal master di Coralp

La zonte provinciâl di Udin e à fate buine la dade fûr di 25 mil euros pal Consorzi universitari "Coralp" di Tumieç, pe metude in vore e la gjestion dal master universitari di prin livel in "Sistemis informatîfs teritoriâi" pa l'an academic 2006/07. Lu dîs l'assessôr ae Universitât e inovazion de Provincie di Udin, Enio De Corte. "Il Consorzi, dulà che, dal Dicembar dal 2005, al cjape dentri ancje il Consei provinciâl - al sclaris - al è indreçât a secondâ e svilupâ inte mont furlane un centri universitari pe formazion avanzade. Une pensade pardabon lodevul che no podevin no poiâ". Il master metût adun de Universitât di Udin e il Coralp, al è indreçât al inscuelament su pes plui modernis tecnologjiis informatichis che e judino la planificazion e conservazion dal teritori e dal ambient, massime di chel montan.

Telefonie mobil: gnûf plan di setôr in Cjargne

Studiâ il livel di funzionalitât dai implants di telefonie mobil che a si cjatin in Cjargne e judicâ il teritori su la fonde di cetancj che a si podìno inmò insedâ. Son chescj, doi dai obietîfs de Comunitât Montane de Cjargne pe metude jù di un Plan di Setôr pe localizazion dai implants di telefonie de Cjargne, che al è stât presentât a Tumieç, i sindics, ai responsabii comunâi dal Plan, aes comissions consultivis e ai gjestôrs di telefonie mobil de Cjargne. La idee, vuidade dal Ufizi Sistemis Informatîfs Teritoriâi e dal assessôr aes Politichis Comunitariis e ae Informatizazion, Marino Pavoni, e è nassude de voie di sostignî i Comuns che, daûr de leç regjonâl 28 dal 2004, ai àn competencis su pe localizazion des infrastruturis di telefonie mobil. "La leç - al dîs Pavoni - a previôt che ogni Comun al inmanei un plan di setôr par scandaiâ i implants che ai son e al studi i lûcs adats par altris eventuali gnûfs implants.

La Comunitât Montane de Cjargne in prime linie pe agriculture

Rimbors (Misure E) e contribûts pes aziendis agriculis de mont par podê comprâ imprescj. Chest il teme di un incuintri jenfri l'assessôr regjonâl Enzo Marsilio, Luciano Mazzolini, assessôr ae Agriculture, Artesanat e Assistence de Comunitât Montane de Cjargne, e cualchi funzionari dal ent tumiezin. L'apontament al à permetût di pandi e sclari miôr, ai rapresentants de agriculture, i ponts di fonde vignûts fûr tal ambît dal Gnûf Progjet Mont.

Par ce che a rivuarde la dade fûr dai rimbors l'assessôr Mazzolini al à impensât cemût che la Zonte de Comunitât Montane, a seti rivade a contentâ dutis lis aziendis che a vevin fat domande intal 2004 (passe 1milion e 200mil euros) e a seti a bon pont par chês dal 2005 (di 1milion e 185mil euros) recuperant il ritart che al ere prime dal insediament da gnove zonte. "Pal 2005 - al à sclarît Mazzolini - son restadis dome 5 inmò da paiâ e prometin di sierâ biel di corse la cuistion".

La Comunitât Montane de Cjargne e siere la cuistion cul Bim

Si è sierade, dopo 4 agns, la cuistion jenfri i Comuns dal Bacin Imbrifar Montan (Bim) e la Comunitât montane de Cjargne. L'ent cjargnel al à in fats decidût, in sedude consiliâr, di no ricori in apel, ricognossint il debit di 397mil euros, fûr di belanç, intai confronts dal consorzi, pal mancjât paiament di boletis pe concession di aghe. "La decision - al à dit Silvano Tomaciello, assessôr ai Servizi e P rogjets de Comunitât montane - a è nassude da volontât di no fâ lâ in piès i rapuarts politics istituzionâi fra i doi ents e, tal stes timp, sparagnâ in spesis legâls". La cuestion, dilunc de asseblee, e a creât un confront indreçât a spartizion des competencis dai difarents ents de mont.

"Mi domandi - al à continuât Tomaciello - se, in cheste spartizion di rûi jenfri i ents montans, a vebi ancjemò un parcè la esistence dal BIM che, da cuant che al à sielt di dâ fûr i fonts des boletis ai comuns consorziâts secont regulis definidis, a davuelç une ativitât dome di resonarie".

Tumieç: cors par operadôr di albierc difondût

Al tacarà martars ai 31 di Otubar, a Tumieç, aì da sede dal CeFAP, il cors par operadôr di albierc difondût, il progjet inmaneât de Agemont, adun cun Turisim Fvj, Direzion Centrâl pes Risorsis Agriculis, Naturâls, Forestâls e a Mont de regjon FVJ e Albiercs Difondûts Fvj. Il cors, di 510 oris, 280 fatis sot forme di stage intun albierc difondût de regjon, al è stât finanziât de Union Europeane, dal Font Social European, dal ministeri dal Lavôr e des Politichis Sociâls e de Region FVJ. Obietîf dal cors al è chel di inscuelâ personâl par chestis struturis, val a dî int buine di dâ acet e sodisfâ dutis i dibisugnis dai turiscj.

"L'albierc difondût - al dîs Alberto Felice De Toni, president de Agemont - al è un mût di dâ acet che al ingolosìs un grum e che al à tancj torneconts, seti pes comunitâts di riferiment seti pal turist, intal rispiet dal patrimoni artistic e culturâl dai paîs cjapâts dentri. A fin dal cors al sarà dât un atestât di cualifiche di prin livel, che al permetarà di lavorâ intal setôr de reception dulà che il turist al scugnarà vê dutis lis informazions su pa zone e su pal lozament, cjavat fûr da struturis locâls.

Rigulât- Contribûts de Regjon

L'Aministrazion comunâl di Rigulât, a podarà rivâ insom ai cantîrs vierts pal miorament da frazion di Ludarie, une des localitâts cjapadis dentri in chês che a otignaran bêçs regjonâi dâts fûr par chei lûcs stimâts tant che Vilis alpinis.

La Regjon , in fats, e à pandût al Comun di Rigulât, la dade fûr di 220 mil euros che ai coventaran par finî i lavôrs a Ludarie, dulà che in cumò ai son tacâts i lavôrs tal 1 e 2 lot, intervents destinâts a presentâ la frazion di Rigulât, tant che la perle de Cjargne. In detai si trate di tornâ a meti jù il pedrât des stradis, cambiâ l'acuedot e la iluminazion publiche

Cun di plui, la Regjon e à fat savê al Comun che al varà inmò 250 mil euros, pe metude a puest dal cjâf lûc e di altris frazions, bêçs ancje chescj doprâts par miorâ i furniments dal paîs, come par esempli i parcs pes machinis. Gust al è stât pandût dal sindic di Rigulât Marcello Candido e dal assessôr ai Lavôrs publics Igor Gollino, che ai metin cussì in cont, cun chescj contribûts, di puartâ a bon fin i impuartants progjets metûts in vore.

Çurçuvint/Sudri - Acuardi pe fusion

Adun cui acuardis pal dâsi dongje dai comuns di Atimis e Faedis e di Cjamplunc e Tapoian, la Zonte regjonâl e à fat buine inte riunion di vinars ai 20 di Otubar, su propueste dal assessôr aes Autonomiis Locâls Franco Iacop, ancje il Protocol che al cjape dentri i comuns di Çurçuvint e Sudri. L' iter che al compagnarà i 2 comuns viers la fusion al sarà poiât de Regjon cuntun contribût di 200 mil euros dividût cussì: passe 92mil euros a pro dal comun di Sudri e plui di 110mil euros a pro di chel di Çurçuvint. In detai, Sudri al doprarà i contribûts regjonâi par meti a puest l'asîl (che al vignarà po dopo doprât ancje dai fruts di Çurçuvint), lavôrs di sistemazion dal municipi e azions di sensibilizazion jenfri la int par pandi i mutîfs da fusion.

Çurçuvint invezit ju doprarà par meti in vore aì dal vecjo asîl un gnûf asîl nît (ancje pai fruts di Sudri e de zone), par meti a puest la sede comunâl, par peâ a mieç di cablis i doi municipis e par pandi, come a Sudri, il parcè di cheste fusion.

Assegnazion di locui intal cimitieri di Sant Danêl.

L'aministrazion comunâl a fâs savê che a partî da lunis ai 23 di Otubar a si pues presentâ domande, a mieç di un scheme za preparât, par prenotâ lis celis mortuorum aì dal cimitieri di Sant Danêl.

Ducj i interessâts a puedin indreçâsi aì dal Ufizi Servizis cimiteriâi al prin plan dal municipi, dulà che al sarà ancje pussibil ritirâ il modul da compilâ.

Incuintri jenfri Provincie e Agemont

Cirî un acuardi jenfri Agemont e i assessorâts a mont des provinciis di Udin e Pordenon. Chest in detai ce che al è saltat fûr di une riunion fate a Damâr dulà che ai jerin presints l'assessôr ae Mont, Vittorio Caroli, il president di Agemont Alberto Felice De Toni e il diretôr di Agemont, Pier Antonio Varutti, e cu la presince ancje dai tecnics de Provincie, Francesco Pecile e Graziella Benati. "Vin volût cjatâsi cui sorestants di Agemont - al à dit Caroli - par ve clâr iniment il pont de situazion dal teritori montan, pandint lis ativitâts che tant che Provincie inmanein a pro di cheste zone. In detai - al à zontât - vin visât il president De Toni de metude jù di un program di svilup pe mont, scrit adun cu la Provincie di Pordenon che, su pe fonde des risorsis che vin in man, stin cirint di concretizâ". De Toni, su chest argoment, dopo ve ripuartât di jessi in colaborazion ancje cu lis Comunitâts montanis, al à pandût la sô disponibilitât a inviâ azions adun ancje cun chei altris assessorât ae mont des provinciis di Udin e Pordenon par dâ snait al svilup sul teritori montan. "In fin dai conts - al à sierât Caroli - si sin metûts dacuardi su par une colaborazion che e podarà davuelzisi su pes instalazions produtivis e economichis de mont, ma ancje creâ gnûfs leams jenfri scuelis e teritori".

Regjon - Proprietâts Coletivis, propueste aes Provinciis

Pes 4 Aministrazions Provinciâls de Regjon a podarès vierzisi un altri impuartant ambît di lavôr e impegn. A chestis in fats a podaressin jessi dadis sù, secont il Coordenament regjonâl des Proprietâts coletivis, i assums di supuart gjestionâl e di control su pai Comitâts di Aministrazion dei Terens civics, e ancje l' adempiment des funzions aministrativis che coventin ancjemò par sancirâ l'ûs civic in ducj i comuns de Regjon. La propueste a è stade fate dal coordenadôr regjonâl des Proprietâts coletivis, Carlo Grogic, al presidente di turni dal Union des Provinciis dal FVJ e al president dal aministrazion provinciâl di Udin, Marzio Strassoldo, cuntun document mandât ancje ai siei coleghis des Provinciis di Gurize, Enrico Gherghetta, di Pordenon, Elio De Anna, e di Triest, Maria Teresa Poropat.

Un resonâ seri e aprofondît su cheste cuestion a sarès par Grogic necessari, viodût il svicinâsi de discussion su pal disegn di leç in materie di Proprietâts coletivis che la Zonte regjonâl e à imprometût di fâ buine dentri da l'an par "jemplâ un vueit che al è da passe 40 agns". "Il podei primari de Regjon in cheste materie, in fats, cemût che al marca il document dal Coordenament al è stât fissat cul statût regjonâl dal 1963".

Cun cheste cuestion, Marzio Strassoldo al veve za vût mut di confrontâsi tant da visite da lui fate, adun cul conseîr ae Culture e aes Pari Oportunitâts Valeria Grillo, ae Proprietât coletive di Pesariis.