NOTIZIARI SETTEMBRE 2006

16 SETTEMBRE 2006

Udc, judâ lis scuelis de mont

I conseîrs regjonâi de UDC Maurizio Salvador e Gina Fasan ai àn depositât un interpelance sul doman des scuelis intai comuns montans. Tai diis stâts vôs butadis fûr dai gjornâi locâi - ai scrivin i doi conseîrs - disin che da bande dal Guvier a sarès l'intenzion di semplificâ (e duncje di taiâ) l'implant scolastic, come simpri par motîfs di spesis, robe che al larès a tocjâ soredut lis scuelis de mont. In Italie, a son passe 4.000 i Comuns montans e plui di 100 chei de nestre regjon che a fasin part des zonis di svantaç socioeconomic, jenfri chescj 47 ai son catalogâts te zone C. Chescj Comuns ai riscje di pierdi lis za pocjis scuelis restadis, tignudis viertis dome pe indurance des comunitâts locâls che, in cualchi câs par tignilis viertis, las mantegnin a lôr spesis. Salvador e Fasan ai impensin cemût che il president de Uncem, Enrico Borghi, al vebi inmaneât un incuintri cul ministri Padoa Schioppa par ribati che la scuele, tant che mieç di rinfuarciment de identitât locâl, massime intai paîs plui piçui e spierdûts, a no po jessi gjavade. E po dopo: a ce pont isal il Gnûf Progjet Mont se, in teme di servizis essenziâi pa int di mont, la situazion a continue a lâ in disot ogni dì di plui, ce iniziativis aie intal cjâf la regjon cul Guvier par rivâ di corse a defiscalizazion des ativitâts economichis, soredut comerciâls, tai comuns regjonâi che ai son inte zone C, par no fâ sierâ chês pocjis piçulis buteghis che a son restadis ?

Inte Comission consiliâr il Plan Promotur

"'nd è dibisugne di une buine cuvierture economiche par fâ in mût che i nestris 5 puescj schiistics a no setino vierts a plen dome il sabide e la domenie, ma ancje dute la setemane. Inte leç finanziarie di chest an a è metude in cont la dade dongje di un Font, aì da Friulia, da doprâ par meti in vore il Plan industriâl de Promotur. Si trate di 10 milions di euros ogni an par 20 agns, a partî da Otubar. La convenzion cun Friulia a è su pe taule de 2 Comission consiliâr, ma al è intal gno interès cjacarâus ancje dal Plan 2006-2010 di Promotur". In curt, chest ce che al à dit l'assessôr aes ativitâts produtivis, Enrico Bertossi. Daspò a è stade lete la relazion dal president e dal diretôr di Promotur, Luca Vidoni e Manlio Petris, e da cheste a si è savût che, inte stagjon invernâl 2005-2006, la int rivade a è stade di 344.666, 447.832 lis presincis riferidis aes zornadis di schi e di passe 6.800 euros i vuadagns, cuntun soreplui vût in gracie dai turiscj, intai albiercs, bars, ristorants, di 21 milions di euros. Roberto De Gioia a si è complimentât pes iniziativis, massime parcè che a no si ere mai fat cussì tant pe modernizazion dai implants. Nevee a po infin vê une pocade, cjapant dentri ancje la metude a puest de strade. La mancjance dai nestris lûcs a è dade dal fat che a no son pissinis, slitis, cjavai e i oraris di vierzidure dai implants a son masse ristrets.

Int contente dal asîl nît "Arcobaleno"

Tant dal meis di Zugn a è stade fate aì dal asîl nît "Arcobaleno" di Tumieç une ricercje par savê se la int a jere contente. Il studi al fâs part de ativitât di rinovament organizatîf che il comun di Tumieç al à inviât tai ultins agns, pocât da scugne di miorâ l'agradiment de int pai servizis inmaneâts de aministrazion, e a va a confrontâsi cu la ricercje fate dal 2005.

I obietîfs di chest lavôr ai erin: capî la cualitât dai servizis metûts in vore dal asîl nît, definî il grât di contentece dai paris e des maris e viodi ce che inmò a si po fâ.

Il cuestionari al è stât jemplât da cuasi ducj. In detai, ce che al è vignût fûr al è che: l'agradiment dal frut intal asîl nît, intune scjale da 1 (orent) a 10 (benissim), al è intune medie dal 9,63 %; chê sul pal servizi ufiert dal asîl nît di 9,54: duncje les maris e i paris ai son sin plui contents che no l'an passât. Dut chest a vûl dî che l'asîl nît di Tumieç al po jessi metût sul stes plan di impuartants struturis nazionâls e al va stimât tant che un servizi di ecelence seti inte nestre regjon che fûr. Il merit di chescj risultâts al va dât prin di dut a responsabil dal asîl e aes maestris, po dopo ancje a ducj chei che a àn lavorât diretementri o no pal funzionament di chest servizi.

Dolomitis Furlanis tant che patrimoni de Unesco

Si svicine il moment da pussibil metude dentri des Dolomitis furlanis intal patrimoni mondiâl dal Unesco. Cu la fin dal meis di Setembar al rivarà in Friûl il professôr Gerhard Heiss, dal Union mondiâl pe nature, che al studiarà in detai la propueste dal inseriment fate de Provincie di Udin. Il progjet al ponte a fâ ricognossi dut l'arc montan dolomitic tant che aree Unesco e par chest la iniziative a cjape dentri ancje lis provinciis di Belun (a cjâf de pensade), Trent, Bolzan e Pordenon. "La propueste inmaneade de Provincie di Udin - al à sclarît l'assessôr provinciâl ae mont Vittorio Caroli - a vûl inserî il Parc des Dolomitis furlanis intal "pachet" des Dolomitis, zontant ancje la Val Pesarine". Chest a permetarès un doman di schivâ altris vincui, sfrutânt lis limitazions za presints te aree dal Parc e tai lûcs che ai son sore ai 1600 metris (leç Galasso). L'Unesco in fats a no vûl meti ancjemò vincui sul teritori. La cuestion a è stade discutude tant di une riunion fate tal municipi di Dimpeç, dulà che ai erin presints cul assessôr provinciâl Caroli, i rapresentants dai comuns di Dimpeç, For Disore, For Disot, Soclêf, Sauris, Prât e dal Parc des Dolomitis Furlanis.

ZUI- La Zonte e incuintre l'assessôr regjonâl Antonaz

L'atenzion de Zonte regjonâl pe valorizazion dai sît archeologjics dal FVJ a è stade marcade dal assessôr regjonâl ae Culture e Istruzion, Roberto Antonaz, tant da passade a Zui, il puest che, cemût che a dîs la citazion, "al stave a vuardie seti dal Pas di Mont di Crôs seti da Val Incaroio, che si cjata dongje de strade romane Claudia che e unive Rome cul Todesc". Adun cul sindic Stelio Dorissa e cun cualchi component da zonte comunâl, l'assessôr al à dit che "chest lûc - tant che testemoneance storiche - al po deventâ une ocasion pal doman di chest paîs se peât cu l'ufierte turistiche". Viodude la scugne di meti in sigurece la robe cjatade e di continuâ a sgarfâ sul puest, e dopo vê controlât i dibisugnis di chei altris sîts archeologjics regjonâi, Antonaz al à fat savê che l'Aministrazion regjonâl e sta pensant di rivâ a destinâ pal 2007 bêçs pe valorizazion e conservazion dai lûcs archeologjics, "parcè che chescj puescj ai son sioretâts che nissun a po copiâ e su chest al è in bal un slambri dal nestri doman". I sgjâfs ai àn tirât fûr il foro e altris robis romanis, che cumò a si cjatin intai locâi dal Museu archeologjic, metût sù dal 1995 intune cjase dal '600.

Friuli doc vetrine pes specialitâts de Alte Furlane

Da bon Tarvisian a nol podeve mancjâ al apontament enogastronomic plui impuartant di Udin, chest an avodât aes specialitâts da Valcjanâl e Cjanâl dal Fier. Pôc prime da inaugurazion, Renato Carlantoni, assessôr provinciâl, adun cul vicesindic di Udin Vincenzo Martines, al à volut passâ a saludâ il stand di Larc Ospedâl Vecjo, dulà che ai erin dâts dongje i parons des ostariis "Al Monton" e "Ai Ors", dal bar "Centrâl" e dal ristorant "Val Verde". "Dîs grazie a ducj i organizadôrs di Friuli doc pal lavôr fat par promovi il teritori - al à dit Carlantoni. Chest an, avodât aes vals dal tarvisian e di Glemone al à par me un significât particolâr e speri che a coventi a fâ cognossi cetant di plui il turisim in cheste zone. Un laut - al à zontât - al va a ducj i partecipants a cheste manifestazion, sparniçâts par dute Udin".

Iniziative di CJARGNE IN MOVIMENT

Il grup "Cjargne in Moviment" al à inmaneât pal 30 di Setembar a Tumieç, des 8 di sere, in place dal Domo: "Serade a Alte Tension", musiche dal vîf cun complès da Cjargne e da Carinzie par indreçâ i zovins a impegnâsi inte difese dal lôr teritori. Jenfri une sunade e chê altre, in fats, ai saran i stes zovins a montâ sul breâr e cjacarâ, proponi, discuti, pocâ a partecipazion sui problemis di vuê, tacant propit da cuestion eletrodot. In cheste serade al sarà simbolichementri ocupât il comun di Tumieç.

Tant da manifestazion a vignaran dâts fûr volantins, gjornâi e mostrâts filmâts su pe ativitât dal Moviment e su pai obietîfs che a si proponin. Volint a si podarà unisi al grup.

Consei di aministrazion Consorzi formadi Montasio

Al è stât Promôs a dâ acet intai diis stâts, ae cunvigne dal Consei di aministrazion dal Consorzi pe tutele dal formadi Montasio, a presince ancje dal assessôr regjonâl ae agriculture, Enzo Marsilio, che cun chei altris al à celebrât i 10 agns de assegnazion dal Dop, il rimarchevul bol di cualitât de Comunitât Europeane.

Tant de riunion l'Assessôr Marsilio al à fat il struc da situazion tal cjamp da produzion dal lat e dai formadis dal FVJ, marcant che il Montasio al figure tant che il 30% da produzion regjonâl e al è un prodot di prin plan sul marcjât.

Cleulis: l' Oktoberfestbier al è achì

Par chei che chest an par tancj motîfs ai noi podaran lâ a Monaco pe tradizionâl fieste da bire, il bar Pakai di Cleulis al à vût une buine pensade. In fats, seti intes zornadis dal 22 e 23 che in chês dal 29 e dal 30, a si podarà gustâ l'origjinâl bire HB, fate vignî diretementri da fieste bavarese, cun di plui tai doi fin setemanis a sarà pussibil cerçâ il tradizionâl mangjâ todesc: speck, würstel e pan neri par ducj, e par cu che a preferìs la nestre cusine la sauride porchete. Cleulis a us spiete!

Caserme "M. Plozner Mentil", dade dongje dai ex

Al è dut un vivôr a Paluce, aì da vecje caserme avodade a portatrice Maria Plozner Mentil. Il grup ANA "Pal Piçul" e il comun, adun cu la brigade alpine "Julia", l' 8 Reziment, la pro loco e la sezion cjargnele dal Ana, ai stan inmaneânt une manifestazion di 3 diis, dal 22 al 24 di Setembar. Il parcè di cheste fieste lu si capis za dal non dât: "Indaûr adun inte Maria Plozner Mentil… radun dai ex". Si trate di fâ tornâ inte caserme, ducj i bataions e lis compagniis che aì as an vivût la naie, fasint la storie da caserme - la sole in Italie a jessi avodade a une femine. Un tornâ indaûr tal timp par chei zovins che in chest puest ai àn passât la lôr vite militâr e che ai àn, dal sigûr, un grum di ricuarts achì ingredeâts.

Il program da manifestazion al è cetant penç e al tacarà in cuote.

Vinars 22, das 10 di buinore, i alpins dal bataion Tumieç ai menaran i vecjos compagns e la int su pai trois de Grande Vuere; aes 5 di sere, a Paluce, seti inte Sale San Jacum che aì dal Irfop, inaugurazion di dôs mostris alpinis. A finî la zornade, aes 9, aì dal cine "Daniel", presentazion dal libri "Alpins in cartuline - storie dai alpins", dal gjenerâl Roberto Rossigni.

Sabide 23, a buinore, a si vierzarà il troi fotografic, che da Gleseute Bataion "Val Tiliment" al rive sù aes caseris di Pal Piçul e Pal Grant. Aes 10.30 al "Daniel", presentazion di un altri libri "Don Carlo Gnocchi, alpin capelan" di Gaetano Agnini. Des 5.30 une prime sfilade dai alpins dilunc Paluce, cul ingrumament te place dal municipi. Significative l'ultime zornade, domenie 24 cul ingrumament e la sfilade dilunc dal paîs des sezions cjargnelis, poiade di une corone di orâr al Monument dai Muarts in Vuere e la messe aes 10.45. Daspò aì da place grande conciert da bande de Brigade alpine "Julia".