|
27 SETTEMBRE 2006
ENEMONÇ - Une cunvigne su pal riordin fondiari Incressi l' agriculture di cualitât, di mût che cheste a fasi aumentâ lis jentradis, strapassant cussì il simpri presint probleme de framentazion dai terens. Cussì a si presentarès la gnove leç regjonâl (numar 16 dal 2006) pe promozion de agriculture montane, discutude tant di une cunvigne a Enemonç dentri de 32.ma Mostre marcjât dal formadi e da scuete. Lassant da bande divisions e spartizions storichis, la leç a vûl rivalutâ i terens montans, pocant l'imprenditorie agricule (soredut dai zovins) su progjets di cualitât. In detai, la leç e met a disposizion un contribût (che al podarà rivâ al 100% des spesis) pe progjetazion e la metude in vore di plans di insediament agricui, la costruzion di infrastruturis, lis divisions di terens e par comprâ lis areis. Cheste leç, pal assessôr regjonâl Enzo Marsilio, e è il risultât di une "plene concuardie di ducj, inta metude adun e aprovazion da bande dal Consei regjonâl. A è dome un pont di partence indreçât a fâ nassi un gnûf mût di cjalâ a mont, creant un svilup agricul compatibil cu l'ambient. Cumò a covente un sfuarç par cambiâ la mentalitât da int". E al zonte: "Nô vin fat il nestri toc, si spietin une rispueste dal teritori, che a seti la volontât, il vivôr e la voie di cjalâ indevant lassant stâ i propis interès". Par chest motîf a son stadis inmaneadis cunvignis (cjapant dentri la Comunitât Montane e i Comuns) par spiegâ l'impuartance di cheste leç e indreçâ ducj a cjalâ al doman cence scusis e beghis. Iniziativis didatichis pal an scolastic 2006-2007 Laboratoris e percors didatics par scuvierzi la storie e l'art ma, ancje, la nature e la culture alimentâr, par invoiâ i fruts a imparâ a mieç da sperimentazion. A chest a son indreçadis lis iniziativis da Comunitât montane de Cjargne, pa l'an di scuele 2006-2007, proponudis a ducj i maestris e i scuelârs da Cjargne e di dute la regjon e che a saran metudis in vore cul jutori di diviersis struturis. "Da cualchi an - al dîs Marino Corti, assessôr ae culture de Comunitât montane de Cjargne - butin fûr, soredut a mieç dal personâl di CarniaMusei, ativitâts didatichis che a judino a insiorâ ce che i fruts ai imparin, cun argoments peâts ai programs che za ai fasin a scuele, ma presentânt lis materiis in mût difarent, cu la sperimentazion. Chest an la vere novitât a è dade de cressude dal numar di laboratoris e iniziativis, e da volontât di cjapâ dentri, no dome la rêt di CarniaMusei, ma ancje altris ents, tant che l'ufizi culture, il sisteme bibliotecari e l'ufizi pes politichis agriculis". Par esempli, i percors su pe culture alimentâr, fats adun cu l'ufizi des politichis agriculis, ai unissaran lis lezions a passade in cualchi dite agroalimentâr locâl. Cun di plui, une iniziative indreçade dome a scuelis da Cjargne a permetarà di puartâ i students intal "itinerari intermusiâl su pe aghe", un zîr di une dì dilunc i diviers museus de Cjargne par scuvierzi lis valencis e cemût doprâ cheste impuartant risorse naturâl. Vie al progjet "Musnet - Eugalc" Tai diis stâts al è stât sotscrit a Tumieç, il document che al inviarà il progjet "Musnet-Eugalc" (Museums network: european children, games and local cultures), l'iniziative che a viôt tant che protagonist la Comunitât montane de Cjargne, la Comunitât montane Alto Agri de Basilicata e il Museu regjonâl da citât ceche di Jicin, fate par judâ il scambi di esperiencis che a judino la metude in rêt dai piçui museus e des ativitâts didatichis indreçadis a valorizâ lis culturis locâls. Il document al è stât firmât da Antonio Maria Imperatrice, vice president de Comunitât montane dal Alto Agri, Jaromir Gottlieb, diretôr dal Museu di Jicin, e Lino Not, president dal ent cjargnel, tant di une passade in Cjargne di un trop di int fasint part dai ents sore nomenâts, che ai àn vût ancje il timp di visitâ la nestre zone e studiâ lis pussibils unions che a si podaressin svilupâ jenfri i 3 teritoris. "Il progjet - al spieghe Lino Not, president da Comunitât montane de Cjargne - a vûl cirî di meti sù une colaborazion jenfri realtâts museâls difarents par pocâ il scambi di competencis e di esperiencis, seti didatichis pai fruts seti di materiâi mutimediâi par cheste sorte di ativitât. L'impuartance de iniziative a è dade da volontât di peâ realtâts piçulis che as àn i stes obietîfs: la valorizazion de culture e des tradizions locâls". Bande largje, prime iniziative ae MERCURIO spa La societât Mercurio FVJ a è stade lumade de Zonte regjonâl - su indicazion dal assessôr Enzo Marsilio - tant che sogjet pe metude in vore e il dopleament des struturis a supuart di servizis telematics e par inviâ la prime iniziative di telepuart satelitâr, o di une struture di comunicazion alternative inte zone montane. La Zonte regjonâl e à decidût il finanziament dal progjet cun 3milions di euros in gracie ancje dal program comunitari Docup Obietîf 2 Svilup dal sisteme di comunicazion e informazion.
Provincie di Udin e Sud Boemie, provis gjenerâls di zimulament Un zimulament jenfri la provincie di Udin e une regjon dal sud da Boemia in Cecoslovachie. Cheste la propueste fate, dal cjâf grup provinciâl da Lega Nord, Stefano Teghil, rapresentant di palaç Belgrât, al Governadôr da regjon ceche, Jan Zahradník, tant di un incuintri jenfri il comun di Vildivar e chel di Lišov, che propit in cheste dade ai stan inviant un zimulament intercomunâl, che al cjape dentri ancje la citât svuizare di Shüpfen. L'incuintri al è stât fat a Lišov, dulà che a si tignive il tradizionâl Festival locâl. "Prime di lâ vie - al à dit Teghil, che al è ancje conseîrs comunâl a Vildivar - ai cjacarât cul consul onorari Paolo Petiziol e, dacuardi cu l'assessôr provinciâl ai rapuarts internazionâi Enio Decorte, vin pensât di profitâ de buine ocasion, che a è l'amistât jenfri i nestris doi Comuns, par puartâ indevant cheste idee e tacâ a cognossisi e colaborâ". "In chest mût" al à sierât Teghil "a si podarès rinfuarcî e fa cressi la cooperazion tal cjamp economic, turistic e culturâl. Un prin pas, duncje, le stât fat, viodût ancje l'entusiasim dai coleghis Boems pe propueste". Il grup furlan, ospit dal sindic di Lišov, Václav Chmel, al cjapave dentri, il sindic di Vildivar Graziano Vatri e altris rapresentants di associazions comunâls. Musiche - Corâl "T. Unfer" di Tamau in fieste pai siei 40 agns di ativitât Dopli aniversari pe Corâl "Teresina Unfer" di Tamau. Chest an il grup al à fiestezât i siei 40 agns di ativitât, 25 di chest sot la direzion dal maestri Dario Scrignaro. Par celebrâ chescj impuartants travuarts, il coro al à inmaneât une rassegne musicâl, dentri da manifestazion alpine "Indaûr adun inta Maria Plozner Mentil... radun dai ex", fate a Paluce dal 22 al 24 di Setembar. La rassegne - clamade "Cjantin De Marzi: vite, sintiments, amôr, passion, ricuarts" - a è stade fate sabide stât, aì da Glesie di Sante Marie a Paluce. Cul coro di Tamau ai erin presints ancje la corâl dal Otâf reziment alpins, chê dal CAI di Cividât e il coro Ciclamin di Maran Vicentin. L'"Unfer" al è nassût intal 1967, in gracie a don Paolo Verzegnassi, ma a si è dât dongje uficialmentri, fat bon il so Statût, il 27 di Fevrâr dal 1978. A partî dal 1981, la so direzion a è stade simpri davuelzude da Dario Scrignaro; il coro al à cussì podût fâ un lavôr di sielte dai cjants, no dome leâts aes funzions religjosis ma ancje ae tradizion montane, aes vilotis furlanis e ae culture timavese inte so lenghe. Fin cumò lis jessudis, tant che partecipazions a cunvignis e rassegnis in Cjargne, in Friûl e fûr, a son stadis passe 300.
CJARGNE - Inovazion tecnologjiche par valorizâ la tradizion L'inovazion tecnologjiche par valorizâ la tradizion. A podarès jessi chest l'argoment dal progjet Candoni inmaneât da Direzion d'Aree Montane de Provincie di Udin e finanziât da Euroleader, che al è tacât in chescj diis, dopo un incuintri jenfri l'Assessôr Provinciâl ae Mont Vittorio Caroli e il President di Euroleader Daniele Petris. "Il progjet - al à impensât l'Assessore Caroli al è indreçât a metude in vore di un laboratori multimediâl aì dal Associazion Candoni a Cedarcjis, par cjapâ dentri 2 classis des scuelis mediis di Darte e Paulâr, che a metino adun un curt filmât e un sît web par pandi lis caratteristichis particolârs di cualchi mistîr de tradizion cjargnele. I mistîrs di îr, mostrâts a mieç des gnovis tecnologjiis, a podin furnî un sburt, di mût che i zovins cjargnei a inventino pal doman lavôrs che ai svilupino gnovis competencis intal setôr des modernis tecnologjiis". Daniele Petris al à ribatût inmò une volte che i programs di Euroleader a son indreçâts soredut ai zovins, seti inte scuele seti sul teritori, propit pe convinzion che il svilup montan, al scugni passâ jenfri i zovins che a decidin di continuâ a vivi ca sù". Dopo l'incuintri jenfri i referents politics dal progjet, al è stât fat chel fra il Dirigjent scolastic prof. D'Avolio e il coordenadôr dal progjet dott. Piutti, l'architet Sandri responsabil dal progjet dentri dal Istitût comprensîf, e i maestris. Dade la citadinance onorarie al Otâf Reziment Alpins "Pal fuart leam cul rimarchevul non da "Julia", tant che çoc da comunitât paluçane e dal Otâf reziment alpins, fîs da valence civiche da int cjargnele, font das nomenades tradizions militârs, pal spirit di servizi e pal grant valôr militâr mostrât in Italie e fûr". Cun chestes peraules e su propueste das associazions militârs, il sindic Aulo Maieron al à dât sabide ai 23 di Setembar, la citadinance onorarie dal comun di Paluce al otâf reziment dai alpins che cumò ai si cjata a Vençon e Cividât. A cerimonie, metude dentri inta fieste "Indaûr adun inta Maria Plozner Mentil…", ai erin presints ancje il president dal consei regjonâl Alessandro Tesini, il senatôr Giovanni Collino, che al fas part da comission difese, il comandant Massimo Panizzi, i sindics di Cividât, Citadele, Arzignan e Pelegrin Parmense (ducj i comuns che ai an dât la citadinance al 8 reziment). Domenie il grant finâl cu l'ingrumament e la sfilade das sezions ANA cjargneles dilunc Paluce, la poiade di une corone di orâr al monument dai muarts in vuere e la messe. Inta place grande, il sindic Maieron e il comandant Panizzi, ai an saludât i passe 1500 presints (un grum di chest ai veva fat la naie inta caserme Maria Plozner). Inschiriâts devant dal palc, i alpins dal 8, cu la divise invernâl da combatiment, une rapresentance dal ploton alpieri. Ducj i "ex" ai son stâts po dopo menâts in caserme compagnâts da bande da Brigade alpine Julia, pa dade fûr dal rancio.
|
