Pittini e Fontanini a ignorin la proteste cuintri dal eletrodot
Il capo progjet de “Alpe Adria Energia” dopo de proteste di sabide a Paluce al dîs: ‘O sperìn di fâ passâ la energjie in chei cablis aeris a tacâ, al massim, dal principi dal 2014’, Pal vice president de Regjon Ciriani: ‘cence l’eletrodot la Cjargne e mûr.’ A sclarî la posizion de cuardade a cinc al è diretementri il capo progjet di “Alpe Adria Energia”, Fabrizio Scaramuzza: “O lin indenant! – al dîs- La soluzion aerie e je la uniche che e pues jessi metude in pratiche te val de Bût e e compuarte un impat ambientâl minim. La soluzion di meti l’eletrodot sot tiere, di fat, dongje dal fat che e vignarès a costâ une vore di plui, no pues jessi metude in pratiche par vie che bisugne lâ ancje sore dai 1500 metris dal Pas di Mont di Crôs. Cheste soluzion, po dopo, e varès un impat ambientâl alt par vie che si scugnarès slambrâ boscs, fâ un sgjâf impuartant e cu la prospetive dopo di “tornâ a vierzi” chel sgjâf pal fat che, dopo 17-20 agns, si scuen cambiâ i cablis”.  Infin, cheste soluzion no pues jessi metude in pratiche ancje par une cuistion di sigurece. “In câs di vuast – al continue Scaramuzza – l’intervent intune linie che e je stade metude sot tiere al è pardabon complicât e a son i stes austriacs che a lassin fûr cheste ipotesi pai timps luncs di intervent in câs di vuast.”

 

Tondo: la preson di Tumieç esempli di integrazion cul teritori
E je une presince aromai integrade tal teritori e te comunitât locâl chê de preson di Tumieç, une presince che si riflet ancje cun efiets positîfs su la zone che i è ator. Cun chestis peraulis il president de Regjon Renzo Tondo al à volût pandi la sodisfazion de comunitât regjonâl pes ativitâts di formazion e di rieducazion che a vegnin fatis tal Istitût di pene di Tumieç. Ativitâts che a son stadis presentadis cja dal municipi dal cjâf lûc cjargnel dal diretôr de preson Silvia Della Branca, di Massimo Marino diretôr dal CEFAP, Centri pe Educazion e pe Formazion Agricule Permanente, e di Evelin Zubin president de cooperative onlus IDA-Associazione MerryGoRound. Tal istitût a vegnin fats cors di inclusion sociâl cun chê di preparâ i galiots te art dai mistîrs e tes ativitâts agriculis, fin a chês dome in aparence plui facilis come l’arlevament dai animâi di curtîl. Chest percors di formazion, organizât in cheste maniere e che ore presint al interesse sessante personis, si rinove za di diviers agns e al à dât risultâts positîfs che a àn metût in lûs il bon esit dal messaç trasmetût par mieç des ativitâts di formazion in vore tal istitût, che a àn la finalitât di recuperâ i mistîrs che nus coleghin al teritori. L’incuintri si è viert cul salût de comunitât locâl de bande dal sindic di Tumieç Dario Zearo.

 

Paulâr de sede municipâl
La Zonte dal Comun di Paulâr, vuidade dal Sindic Maurizio, in une riunion fate che nol è trop e à deliberât ae unanimitât di dâ la sô poie, condividint lis motivazions, ae azion inviade dal Ordin dai Avocats di Tumieç in relazion ae funzionalitât dai Uficis Judiziaris dal Tribunâl di Tumieç. Dal moment che si pense che la situazion di mancjance di personâl cja dai Uficis judiziaris e compuarti par ducj i citadins grâfs disservizis e che il funzionament dal servizi justizie tal circondari al ven metût in pericul, dongje de poie e de condivision pe azion che i avocats a àn inviât, il Sindic al à mandât une letare cu la delibare in zontât al Ministri de Justizie, al Consei Superiôr de Magjistrature, al President de Cort di Apel di Triest, al President dal Tribunâl di Tumieç, al Procuradôr de Republiche di Tumieç, al President de Zonte Regjonâl dal Friûl Vignesie Julie e a chei altris Sindics dal circondari dal Tribunâl di Tumieç.

 

I vigjii urbans di doman a cressin a Paluce
A son 20 tra uficiâi e sotuficiâi i vigjii urbans che di dut il Friûl Vignesie Julie a àn screât a Paluce il prin cors par comandants dai cuarps e responsabii dai servizis di Polizie locâl de Regjon, che si davuelç tes struturis dal Cesfam, il Centri servizis pes forestis e lis ativitâts de Mont. A tignî a batisim la iniziative al è stât l’assessôr regjonâl competent Federica Seganti. Il cors al è dutun cul programe permanent di formazion pe Polizie locâl.

 

Scuele in Mont, ‘La Zonte e à fissât criteris plui dûrs’
“La propueste di Molinaro – al à declarât il Conseîr regjonâl Della Mea – e scancele ce che al jere stât fat bon ae unanimitât tal mês di Jugn stât dal Consei regjonâl cuntun ordin dal dì che al impegnave la maiorance a fâ une serie di iniziativis par protezi e rinfuarcî la scuele in mont”. La zonte regjonâl è à fat buine une delibare par dimensionâ la ufierte formative scolastiche pal an 2011-2012 cuntune propueste che e previôt criteris cetant plui dûrs di ce che e fisse la riforme Gelmini e lis ordenancis ministeriâls seguitivis. Ancje se si pues capî la necessitât di fâ une riorganizazion totâl des sedis scolastichis pal 2011-2012, no si pues acetâ une propueste che e met in pericul la plui part dai ples scolastics in teritori montan. “La propueste di Molinaro – al à declarât il Conseîr Sandro Della Mea - e scancele ce che al jere stât fat bon ae unanimitât tal mês di Jugn stât dal Consei regjonâl cuntun ordin dal dì che al impegnave la maiorance a fâ une serie di iniziativis par protezi e rinfuarcî la scuele in mont”.

 

Crisi Politiche, cussì le pense Renzo Tondo
O speravi che lis robis a lassin in maniere divierse e invezit aromai o crôt che no sedin tropis pussibilitâts... Gianfranco Fini al à fat dimeti i siei, che a àn lassât il guvier Berlusconi. Il President de Cjamare invezit al reste tal so puest. Cui prodest? Il guvier al à metût in pratiche cierts ponts impuartants dal programe che al veve presentât ai eletôrs, cundut che si è intune situazion nazionâl e internazionâl di grandissime dificoltât. A dispiet dal impegn dal esecutîf, a son aumentâts i atacs, e no mi riferìs ae oposizion che e fâs ben o mâl il so mistîr. O pensavi e o pensi ancjemò che la sielte fate tal mês di Lui passât dal ufici di Presidence dal Pdl di rompi cun Fini no fos stade fate tal moment just, ma vuê par me no si pues spiegâ il mût di fâ dal President de Cjamare. Se la situazion e ves di lâ di piês, si cjatarìn cence di un guvier propit cuant che il Paîs al varès dibisugne di stabilitât e chest parcè che si è volût cun ustinazion bati une strade che pe sô lidrîs personalistiche no scjampe a dinissun. Il dut dant vie libare a trucs di palaç che o crodevi che a fossin aromai part dal passât.

 

Tumieç, cors a gratis di talian par grancj
La scjadince pe consegne des prenotazions pal cors di talian par forescj inmaneât de Aministrazion comunâl di Tumieç al è stât spostât indenant ai 23 di Novembar 2010. La iniziative, coordenade dal assessôr ae Istruzion Mario Cuder, e vûl ufrî une ocasion di integrazion culturâl e sociâl ai forescj che a vivin e che a lavorin tra di nô. La iniziative e je cofinanziade dal Fonts Social European, par mieç de Regjon Friûl Vignesie Julie e e sarà gjestide li dal ent di Formazion Enaip che al à i siei uficis e i siei spazis operatîfs te zone industriâl di Tumieç. Lis domandis des personis interessadis, che a àn di jessi almancul 12, a varan di jessi compiladis di persone jemplant un modul che si pues cjatâlu li de sede dal Enaip in vie dell’Industria 12, cja dal Sportel dal Citadin dal Comun di Tumieç in palce XX Settembre, 1 e sul sît internet www.comune.tolmezzo.ud.it .

 

Zonte provinciâl, fat bon il belanç di prevision 2011
Un document contabil tal segn dal rigôr. La plui part des vôs dal belanç di prevision 2011 fat bon de Zonte provinciâl a son stadis comedadis in forme negative. Jentradis e spesis a son a pâr cun 192 milions 618 mil euros, cuant che tes previsions dal 2010 l’impuart al jere di 207 milions di euros (sù pa jù 15 milions la diference). “Une riduzion impuartant – al marche il president de Provincie di Udin, on. Pieri Fontanini – che o vin scugnût fâ par vie des condizions leadis ae situazion economiche che e à puartât a une diminuzion (di un milion di euros) des jentradis tributariis ordenariis: adizionâls sui consums di energjie eletriche e iscrizion al regjistri automobilistic – Pra.

 

Tutele dal rosean. Fat bon dal Consei provinciâl
In difese dal rosean, a pro de sô adesion al grup linguistic furlan come declarazion di apartignince no glotologjiche ma, plui in gjenerâl, al Friûl e ae Italie. Cussì al à proferît il Consei provinciâl di Udin che al à fat bon, cu la maiorance dai vôts (18 sì, 10 no de minorance) un ordin dal dì presentât par chest cont dal Conseîr Renato Carlantoni. Une posizion cheste che si concretize tal impegn di puartâ indenant la juste rivendicazion di cheste minorance linguistiche tai sîts istituzionâi plui juscj par fâ valê dirits e identitât linguistiche come che al sucêt par altris minorancis.

 

Ricercje archeologjiche de Universitât di Udin a Qatna (Sirie)
Dodis agns di sgjâfs, centenârs di personis coinvolzudis tra students de Universitât di Udin e professioniscj furlans, straordenariis lis scuviertis fatis sul passât di Qatna. Al è un belanç di ecelence chel des campagnis di sgjâfs coordenadis de Universitât dal Friûl in Sirie (in colaborazion cu la Direzion gjenerâl des antichitâts e dai museus de Sirie); une ativitât che e met la Universitât di Udin e il Friûl intune posizion di primât mondiâl assolût e ricognossût te ricercje archeologjiche orientâl. Une visibilitât che e pues fâ di sburt pes ativitâts di internazionalizazion dal mont economic furlan. Lu àn dit tai lôr intervents te cunvigne “Tesori dell’antica Siria. La scoperta de Regno di Qatna”, il president de Provincie di Udin, on. Pieri Fontanini e il retôr de Universitât di Udin Cristina Compagno. “Cheste mission- al à marcât il president Fontanini – e da glorie e impuartance internazionâl ae nestre Universitât che e vuide un progjet cun risultâts straordenaris.”

 

A scomencin i incuintris sul Sisteme informatîf montan
Un imprest di supuart ae ativitât dai uficis tecnics comunâi, in particolâr te elaborazion di imprescj urbanistics complicâts, e bon di miorâ la lôr eficience. Si trate dal Sisteme informatîf montan (Sim), metût in pîts de Comunitât montane de Cjargne cun chê di favorî il lavôr dai funzionaris tecnics che a lavorin sul teritori. Cun chê di spiegâ il progjet ai dipendents comunâi interessâts, l’ent al à inmaneât doi incuintris. Il prin, che si è davuelt joibe ai 18 di Novembar cja de sede de Comunitât montane a Tumieç, al à sclarît cualis che a son lis oportunitâts ufiertis dal Sim tal fâ lis pratichis aministrativis di ogni dì, come la consultazion simultanie de cjarte tecniche regjonâl, de cjarte catasticâl, dal plan regoladôr e de cjarte dai vincui ambientâi e normatîfs.
“Si trate di un progjet impuartant – al spieghe il comissari de Comunitât montane de Cjargne, Giovanni Battista Somma – parcè che al permet di ufrî ai Comuns un imprest “fat su misure” pai uficis tecnics, bon di judâju te gjestion des diviersis pratichis tal cjamp de urbanistiche ma, ancje, di vê la pussibilitât di rispuindi in maniere svelte e valide a lis domandis che a vegnin fatis plui dispès dai citadins.

 

Comunicât Stampe
A son viertis lis preiscrizions cja dal Cefap, sede di Tumieç, pal cors serâl di “L’angolo delle piante officinali e aromatiche”. A son previodudis 10 oris di lezion dividudis in 5 lezions di dôs oris cun orari serâl des 18 aes 20.
I esperts che a intervignaran te ativitât di formazion a vuidaran i partecipants intun percors di cognossince che, partint des primis testemoneancis sul ûs des plantis aromatichis e dai preparâts gjavâts fûr di chestis, al rivarà fin al lôr ûs presint in cjamps diviers: estetic, alimentâr, terapeutic e v.i. Par altris informazions e iscrizions i interessâts a puedin lâ intant dal orari di ufici, dal lunis al vinars, li dal CEFAP di Tumieç (zone industriâl sud) o telefonâ al 0433.468042. .